Covid-19 vangin mi 20 an thi tawh

Mizoramah Covid-19 vei August 26, Zirtawpni khan mi 101 leh August 27, Inrinni khan mi 72 hmuh chhuah a ni a, August thla chhungin mi 4,043 hmuh chhuah a ni tawh. Inrinni leh nimin khan hripui vei dam tawh mi 190 chhuahtir an ni a, Covid-19 vanga thi mi pathum an awm belh.

August 26-a Covid-19 positive hmuh chhuah mi 101-te chu mipa 55 leh hmeichhia 46 an ni a, RAT hmanga hmuh vek niin, swab sample endik zat 619 aṭanga positivity rate chu 16.32% a ni. Inrinnia hripui vei hmuh thar mi 72-te chu mipa 33 leh hmeichhia 39 an ni a; RAT hmanga hmuh chhuah vek niin, sample 403 endik aṭanga positivity rate chu 17.87% a tling.

Hripui vei enkawl lai Lalchhandami (2), Champhai Kahrawt chu Inrinni zan zanlai pelh hnu, dar 12:20 khan Champhai DCHC-ah a thi a; Covid-19 vei a ni tih August 26 khan hmuh chhuah a ni.

Nimin chhun dar 11:30 khan Zopari (70), North Vanlaiphai chu hripui vangin State Referral Hospital-ah a thi. Covid-19 positive a ni tih August 23 khan hmuh chhuah niin, nimin khan SRH-ah dah luh a ni a, natna dang nei a ni tih sorkar thuchhuakin a tarlang.

JH Vanlalmuana (47), Champhai Electric Veng pawh August 12, 2022 zing dar 4:45 khan Champhai DCHC-ah hripui vangin a thi a; natna dang nei tel niin, August 11, 2022 khan Covid-19 positive a ni tih hmuh chhuah a ni.

Nimin khan hripui vei dam tawh mi 72 chhuahtir an ni a, Inrinni khan mi 118 chhuahtir an ni bawk.

IDSP record angin, Mizoramah Covid-19 vei 2,36,843 hmuh chhuah a ni tawh a, mipa 1,10,292 leh hmeichhia 1,26,551 an ni a, mipa aiin hmeichhia 16,259-in an tam zawk. Nimin tlai dar 5 thleng khan mi 2,35,555 (99.46%) chhuahtir an ni tawh a, mi 720 (0.30%) thi tawhin, enkawl mek mi 568 (0.24%) an awm.

Kum 2011 chhiarpui angin, Covid-19 vei hmuh tawh 2,36,843 chu state mipui zat aṭangin 21.59% a tling a, India rama state zingah a sang ber. Mi 1,000 zelah positive 215 an awm tawh ang a ni a, hripui vangin mi 1,00,000 zelah mi 65 an thi tawh ang a ni bawk.