KHAWTHLIR

Kohhran puitlingah Hlâng kai
West Delhi Mizo Presbyterian Church, branch church ni mek chu nimin khan Mizoram Synod moderator Rev. Dr Vanlalnghaka Ralte-in kohhran puitlingah a hlâng kai. Delhi Mizo Presbyterian Church (DMPC)-ah hian DMPC Kohhran, Delhi West Kohhran leh Delhi North Kohhrante a awm a; nimina kohhran puitlinga hlân kai tâk Delhi West Kohhran hi September 16, 2018 aṭangin branch a ni a, member 144 an awm mek a ni. Delhi-ah hian Mizo Presbyterian Kohhran puitling pahnih a awm mek a, Delhi North Branch Church erawh chu kohhran puitlingah hlàn kai a la ni lo.

Graduation Day
Siaha District Institute for Education and Training (DIET) chuan August 26, 2022 khan MYA Multipurpose Hall-ah Graduation Day an hmang a, district bawrhsap Lalsangliana'n a hmanpui. Kum 2020 batch D.El.Ed trainee, kumina pass chhuak mi 41 thlah an ni.

Minister-in hmanpui
6th Mizoram State MMA (Mixed Martial Arts) Amateur Championship 2022 chu August 27, Inrinni khan Elite MMA & Fitness Gym, Vaivakawnah khâr a ni a, MISMA patron leh minister R Lalzirliana'n a hmanpui. Minister chuan, Mizote'n infiamna an thlan thiam a ṭul thu leh mixed martial arts chu Mizote tana ṭha nia a hriat thu a sawi.

Mi 24 táng mek
Lawngtlai bawrhsap Amol Srivastava leh chief judicial magistrate Renee Lalremsiami te chuan August 26, 2022 khan Lawngtlai District Jail an tlawh a, harsatna leh mamawhte an sawipui. Lawngtlai District Jail-ah hian táng mi 24 an awm mek a, chu'ng zinga mi 17 chu thiam loh chantir tawh niin, mi dang pasarih chu an chungthu ngaihtuah mek an ni.

Pisa hawng
August 27, Inrinni khan Farmers Producers Company pisa, Sesawnga mi chu pisa hawn a nih theihna atana hmalatu social worker B Lalchhanzova'n a hawng. Sesawng Farmer Company hi India sorkarin India rama farmer company 10,000 din tura hma a lakna kal zela din niin, National Agriculture Cooperative Marketing Federation of India kaltlanga din a ni a, NAFED kaltlangin Mizoramah farmer company pali din mek a ni.