Aizawl SP-in thawhpuiah mipui a sáwm

Aizawl superintendent of police (SP) Neihchungnunga chuan Aizawl district-a dan leh thupek kenkawh kawng­ah police-te thawhpuia ṭawiawm turin media hrang hrangte leh mipui a sáwm.

Aizawl SP hian nimin khan a pisaah thuthar thehdarhtute thingpui a inpui a; dan leh thupek kenkawh chu hna hautak tak a nih thu sawiin, "Huphurhawm viau mah se, theihtawp kan chhuah dawn a; media-te leh mipui thawhpuina kan ngen a, min thawhpui loh chuan thil tih tak tak a harsa a ni," a ti.

Aizawl SP thar Neihchungnunga, IPS hian a hna thar hi July 17, 2017-ah a zawm a ni.

Neihchungnunga chuan tun hnaiah mobile banking hmanga inbumna a awm zauh zauh tih sawiin, hetiang lamah hian fimkhur turin mipui a ngen a; fûr laiin mi thil rûk ching leh in leh dawr rawk chíngte an chet hlaur deuh ṭhin avangin fimkhur turin mipui a ngen bawk.

Aizawl SP sawi danin, Malsawm­dawnga (26) s/o Lalṭanpuia, Luangmual West chu a taxi khalh ṭhin neitu bank account chu a pu hriat lohin a mobile phone number nen a zawmtir a, net banking hmangin Rs. 50,000 a lak chhuahsak hman. Hei vang hian Malsawmdawnga hi police-in an man a, Vaivakawn Police Station-ah tuhbuai siamsak a ni.

Inkawmhonaah hian MJA member-te pawhin thawhhona ṭha zawk a awm theihna atana police lam mawhphurhna nia an hriat te, thudik tak mipuite'n an hriat theihna atana police lamin information an neih zung zung a pawimawh thute leh buaina a chhuaha police lam an mualpho lohna atana an fimkhur a ṭul thute an sawi.