Mamit Hmarveng bazar building A nihna anga hman phût

Mamita V/C leh tlawm­ngai pawl hrang hrangte leh Mamit Hmarveng V/C-te chuan, Mamit Hmarveng bazar building, Jawahar Navodaya Vidhyalaya (JNV)-in kum 2008 aṭanga tun thlenga sikul leh hostel atana an la hmang chu pawi an tih thu an tarlang a; building chu a nihna tur taka hman a nih theih nan hma la turin thuneitute an phût.

Mamita V/C-te leh NGO-te tarlan danin, Hmarveng bazar building hi Trade & Commerce department sak a ni a, bazar atana luah a nih hmain, kum 2008 aṭangin JNV atan hman a ni. MAMCO-in Trade & Commerce-ah a dil angin, Trade & Commerce leh MAMCO chuan JNV tur Khiangthelh hmuna sak mek sak zawh a nih hma JNV luah turin kum 2011-ah kum thum chhugn atan inremna an siam a; Hmar­veng mipui pawhin Mamit district-in sikul ṭha an neihna tur a nih chuan tiin phal takin an hrethiam a ni.

Inremna hmasa a tawp hnuah kum thum dang atan inremna ziah leh a ni a, chu chu Febuary 27, 2015-ah inremna chu a tawp a; JNV tur MAMCO enkawlna hnuaia sak chu zawh a la nih loh avangin tun thlengin bazar building-ah JNV chu dah a la ni. Hmarveng mipui hriat lohin December 2017 thleng awm phalna JNV pek leh tawh a ni bawk.

Mamit V/C-te leh NGO-te chuan, Hmarveng bazar building chu a nihna tur dik tak leh ṭangkai taka hman theih a nih theih nana chak taka hma la turin sorkar an phût a, "JNV building tur Khiangthleh hmuna sak mek chawlhsan a ni hi pawi kan ti a, a satu contractor-te pawh chak taka hna thawk tur leh kumin chhunga zo hman ngei turin kan phût. JNV hi kan duh lo a ni lo a, an awmna tur anmahni hmun ngeiah an awm vat hi kan duhsakpui a ni," an ti.

MAMCO chu an hnuaia hna thawkte vil ṭha tur leh, hna thawk ṭha duh lo chu bàn ngam turin an ngen a; contractor hna thawk thei lo duhsak vanga mipui tawrhna titawp turin MAMCO an phût bawk.