Global Gorkhaland Unity March huaihawt

Gorkhaland Support Coordination Committee, Mizoram (GSCCM) chuan July 30, Pathianni khan Gorkha School Complex, Khatlaah 'Global Gorkhaland Unity March’ an huaihawt.

'Global Gorkhaland Unity March’ hi Gorkha hnam chenna hmun, Darjeeling leh a chhehvela Gorkha hnam puala state, Gorkhaland siam phûtna leh Gorkha hnamte chunga West Bengal sorkarin hleilenna a lantir duh loh lantirna atana khawvel pum huapa huaihawt a ni a, khawvela khawpui 150 velah hman a ni.

Mizoramah chuan Global Gorkhaland Unity March hi Aizawl leh Kolasib-ah huaihawt a ni a, Gorkha mi ṭhahnem tak an tel. GSCCM hian prime minister Narendra Modi hnenah memorandum an thehlut nghal.

GSCCM tarlan danin, Darjeeling leh a chhehvelah tharum thawh loa Gorkha nuarte chu West Bengal sorkarin a páwng kah chiam avangin mi 11 an thi tawh a; internet leh local TV channel-te tihtawpsak a ni a, Bengal police-te hmangin ei tur thawn luhte hrêk a nih bakah, Siliguri-ah Sikkim mipuite leh Gorkha hnamte rîkrâp mek an ni.

GSCCM chuan, Darjeeling leh a chhehvela an hnampuite'n Gorkhaland an ngiat chu âwm an ti a, an thlàwp tlat thu an tarlang a, "Kum tam tak aṭanga Gorkha hnamin an lo beisei leh duh dan angin, sorkar laipui hian rang taka state hran din tura hma la turin a duh tak meuh a ni," an ti.

GSCCM chuan, Gorkhaland din a nih theih nana hmalaknate chu thlawp a, a hlawhtlin theih nana ṭawngṭaisak turin Mizoram sorkar, political party, tlawmngai pawl, kohhran leh mipuite an ngen a ni.