Boxer Laldinmawia chawimawina hlan

Sports & Youth Services minister Zodin-tluanga chuan nimin khan a pisaah 21st. International Boxing Simon Trestin Memorial Tournament, Ukraine-a neiha India aiawha gold medal latu - Laldinmawia, Tuipui, Champhai chu chawimawina a hlân.

Zodintluanga chuan, khawvel huapa gold medal lak chu thil namailo a nih thu sawiin, "He hlawhtlinna hi entawn tlak tak a ni. Infiamna lamah Mizote kan ṭhang nasa tiin remchanna la a, ṭhalaite'n hman ṭangkai an tum a pawimawh," a ti a; Mizo ṭhalaite chu taimakna leh insûmtheihna nen theih-tawp chhuah turin a fuih.

Minister Zodintluanga hian Laldinmawia hnenah hian kit allowance Rs. 10,000 a hlan a ni.

Laldinmawia chawimawina hunah hian parliamentary secretary (SYS) Hmingdailova Khiangte, SYS secretary HL Rochungnunga, Mizoram State Sports Council secretary C Lal-tlanthanga leh Mizoram State Boxing Association hruaitute an tel.