Damdawi-in inrêlbawl dan thlir

Kolasib District Hospital inrêlbàwl dan leh inenkawl dan thlirin District Hospital-a Rogi Kalyan Samiti (RKS) Governing Body chu nimin khan an chairman Dr Arun T, Kolasib DC hoin DC conference hall-ah an ṭhukhawm.

Meeting-ah hian, security duty tur pakhat lak chungchang te, kum kal meka sum an hmuh dan te, inrêlbàwl dan te, AYUSH building-a casualty sawn dan turte leh ICU khum pahnih awmna dah theih dan turte sawiho a ni.

Damdawi-in fai inelna, Kayakalp atana inbuatsaihna kal mek leh hmalak zel dan tur sawiho a ni bawk a; damdawi-in fai ber ni tura hmalakna atan tlawmngai pawl hrang hrangte'n thâ thawh an inhuam thu tarlan a ni.