Kan sorkar hunah CHC kan din dawn - Lalduhoma

ZNP president Lalduhoma chuan, ZNP a sorkar hunah community healing centre chang-tlung tak an din dawn tih a puang.

Nimina ZNP pisaa inkhawmah thu sawiin Lalduhoma chuan, pian­phunga rualbanlo, ngawlvei, KS leh ṭhalai rahbi tleu enkawlna tur changtlung tak, community healing centre (CHC) mamawhna a sáng hle niin a sawi a, "World Health Organisation hriat leh puih thamin CHC-ah hian tui, êng, khelmual, park, primary health centre sikul, vocational course leh a dangte dah a ni ang. Centre aṭanga an chhuah hunah mahni kea ding thei turin CHC changtlung tak kan din dawn a ni,” a ti.

Mizoram sorkarin home leh centre enkawlna dan mumal tak tun thlengin a la nei lo tih sawiin Duhoma chuan, "Tuna centre kan neih zawng zawng hi mamawh chhanna a tling lo tih hi ZNP hmuh dan a ni. Chutih rualin, neih loh theih loh, ṭul si a ni," a ti a; ruihhlo vangin Mizo hnam khawvelah a mualpho mek a, ramthar field rawngbawlna thlengin a nghawng niin a sawi.

ZNP President chuan, ruihhlo leh a kaihhnawih vangin Mizoramah mi 1,440 vel an thi tawh tih sawiin, "A tak takah chuan hei ai hian an tam daih ang, enkawlna mumal kan neih loh vang a ni. Mizoram zím têah hian ruihhlo ngai kan tih hi enkawl hautak tham lutuk pawh an la ni lo,” a ti a ni.