Naupang khuaikhem tumtute man

Pathianni tlai leh zanah khan Aizawl khawpui chhung hmun hnihahh kum tling lo naupang pahnih laka mawi lo taka chet tum an awm a, pawi khawih tumtute hi pawi nasa zawk an khawih hma-in man an ni.

Pathianni tlai khan Tlangnuam West-ah mipa naupang infiam zinga kal fal deuh chu Dilwer Hussain (19), Karimganj lam miin lo man betin, vawk chaw chhumna inah a luhpui a, naupang hi au pahin a tlan chhuak a ni.

He thil thleng hi a bul hnaia awmte'n an hriatin Dilwer Hussain hi an um a, an man a ni. Khaw­tlang hruaitute'n an zilhhau hnuah Kulikawn Police Station an hriattir a, police-te thlen hnuah Dilwer Hussain hi ah dahna in tukverh aṭangin a zuangthla a ni.

Khawtlang mipui leh police-te'n Dilwer Hussain hi zawng nghal­in, nimin zing dar 6 vel khan Kulikawna mi in rel hnuai­a a mu lai man a ni.

Pathianni zan dar 8 vel khan Dawrpui Vengah hmeichhe naupang pakhat chu, kum tlinglo mipa pakhatin a chhungte hriat lohin an lenna in aṭangin a hruai chhuak a, naupang hi a ka hnawhsakin hruai bo a tum nia sawi a ni.

Hmeichhe naupang ṭap thawm hria, a chhung­te leh a bul hnaia awmte chuan, hmeichhe naupang hi chhanchhuakin, hruai bo tumtu hi an man nghal a ni. Naupang hruai bo tumtu hian mipui thinrim kut a tuar nual a, Dawrpui khawtlang hruaituten police kutah an hlan a ni.