KHAWTHLIR

Mi 1,124 admit
June 2017 chhung khan Aizawl Civil Hospital-ah mi 28,568 an inentir a, chu'ng zinga mi 1,124 chu admit an ni. June thla chhung vêk khan mi 54 an thi a, nau piang 313 an awm a; mi 218 chu Mizoram páwna inenkawl tura refer an ni.

Zirtirtute Ni
Siaha District Teachers’ Day Organising Committee chu nimin khan DC Harleen Kaur hoin DC conference hall-ah an ṭhu a, kumin Teachers' Day-ah zirtirtu thawk ṭhate chawimawina hlan an rêl. Meeting chuan, "Zirtirtu thawk ṭha thlang turin headmaster-te'n an recommend-te chu Sub-Committee hnenah thehluh ni se, Sub-Committee-in final selection a nei ang," a ti.

Thawhpuiah sáwm
Lungleia IPRO thar C Lalremruati chuan nimin khan Lunglei District MJA member-te IPR conference hall-ah a kâwm. IPRO chuan inpawh tlang taka hna thawhpuiah chanchinbumite a sawm a, IPRO office-ah tlangnêl tak leh neitu rilru pua an mamawhte thlen ṭhin turin a chah.

Prism manifesto
PRISM thuchhuah chuan, vawiin hian kum 2018 Assembly inthlana PRISM election manifesto an buatsaih chu an tlangzarh dawn tih a tarlang. PRISM manifesto tlangzarh inkhawm hi State Guest House-ah neih a ni ang.

MCAB din champha
Nimin July 31 khan Mizoram Cooperative Apex Bank (MCAB) din champha vawi 35-na a ni a, Apex Bank hrang hrangte'n an office/branch ṭheuhah lawmin, anmahni dawrtute tan a thlawnin thingpui leh a hmeh an chhawp.