Bawlhhlawh/leivûng paih rutu thuneitu hnena hriattirtute lawmman pek tum ; Leivûng paih danah NGT-ah zualko tum

Save Mizoram Rivers (SMR) chuan, Sairang leh Khàmráng khaw inkar kawngpui sira bawlhhlawh paih ru ṭhinte man chhuahna tura thuneitute puitute hnenah lawmman pek an tum thu an puang. National highway kawngpui laihnaa leivûng paih dan dik lo chungchangah National Green Tribunal-ah zualko an tum thu an sawi bawk.

SMR hruaitute chuan nimin khan Aizawl Press Club-ah thuthar thehdarhtute an kâwm a; SMR convener Dr H Lalthanzara chuan, Sairang leh Khamrang inkar kawngpui sira bawlhhlawh paih ru ṭhin hria leh hmute chu a rang thei ang bera Sairang Police Station (phone 0389-2568209) emaw, Kawnpui Police Station (phone 03837-266459) emawah hriattir vat turin an ngen tih a sawi a, "He laia bawlhhlawh paih ru ṭhinte man chhuah kawnga thuneitute pui theitute chu SMR hmingin lawmman pek an ni ang," a ti.

Dr H Lalthanzara chuan, Sairang leh Khamrang inkar kawngpui sira bawlhhlawh paih a ni ṭhin chu pawi an tih thu sawiin, "Tlawng luia a luh thlak nghal mai ṭhin avang leh ram dang khualzinte veivah tamna a nih avangin kan hriselna khawih chhetu leh Mizoram hmél tibàltu lian takah kan ngai," a ti a; bawlhhlawh paih khapna thupek Kolasib DC John LT Sanga leh Aizawl DC Dr Lalhriatzuali ten an tichhuak chu lawmawm an tih thu a sawi.

SMR working convener Vanneihthanga Vanchhawng chuan, kawngpui sira bawlhhlawh leh leivung paih chungchangah sorkar a chak tâwk lo an ti lem lo tih a sawirualin, "Inhriatpawh tawn loh te, thawhhona ṭha tâwk lote a awm palh thei a, theihtawpa hmalak kan tum a ni," a ti a; SMR-a tel duh apiang lawm takin an pawm thei a, tel zel turin mipui a sáwm.

Zawhna chhangin SMR general secretary Vanlalhrima chuan, "Kan lui kamte riverine forest area ni siin, mimal ram vek a ni. Court thu kal mek avangin Environment, Forest and Climate Change department an tím deuh niin kan hria. Chung lam aṭanga thu dawn an nei em maw ni chu tih tur a awm a, thil inphúm a awm a nih kan ring," a ti a; bawlhhlawh leh leivung paih chungchangah dan a awm ṭhat tâwk loh thu a sawi.

Vanlalhrima chuan, sorkar leh EFCC department chu kawngpui laihna leivûng paihin nasa taka ram leilung leh luite a tihchhiat dan endika kal kual àwm tak leh court emaw, National Green Tribunal emawa zualko tur àwm tak nia an hriat thu a sawi a, "An kal si lo a, keini hi NGT-ah zualko kan tum ta a ni," a ti.

Vanneihthanga Vanchhawng pawhin, "Kan muthlu rei lutuk a ni. EFCC department, district thuneitute leh mipui kan muthlu rei a, kan tlai mah mah tawh a ni," a ti a; tunah erawh chuan sorkar leh mipui pawhin hma an lak tawh thu a sawi.

SMR hmalaknain Mizoram pum a huam tih sawiin Vanneihthanga chuan, "Aizawl tui tlan Tlawng lui hi ngaih pawimawh hmasakah kan nei. Tuihna a tlém a, lui tui a kiam mek laiin, a awm chhun kan tibawlhhlawh nasa. Vailui dung kan ti bawlhhlawh nasa a, mipuiin bawlhhlawh paih loa ṭan kan lâk tlân nasat a ngai. Kan tui in turah bawlhhlawh chi tinréng kan paih hi a fel lo hle a ni," a ti.

SMR Working Convener chuan, leivung paih tur a awm lo thei lo tih sawiin, "Leivung paihna kan mamawh a, paihna hmun tur kan dap a, Maubawk ramah paihna siam turin project buaipui mek a ni," a ti a; Chief Minister hnenah an thlen tawh thu leh CM pawhin a ngaih pawimawh thu a sawi.