Lungsenah sorkar pisa kái tur dang

Lungsen High School-a zirtirtu a ngheta thawk (regular teacher) dah tura sorkar an phûtna kal zelah Lungsen NGO Coordination Committee chuan nimin aṭang khan Lungsen khuaa sorkar office zawng zawnga pisa kái tur an dang.

Lungsen NGO-te chuan, an khuaa sorkar pisate chu niminah an dan bakah, vawiinah dan leh an tum a; sorkar pisa kai tur an dan hian awmzia a neih loh a, Lungsen H/S-ah regular teacher dah tumna a la awm lo zel a nih chuan August 31, naktuk aṭangin total bandh huaihawt an tum a ni.

NGO Coordination Committee chuan, Lungsen H/S-ah regular teacher dah an phût tlat tih an sawi nawn a; zirtirtu dangah harsatna an neih loh thu sawiin, khaw hrang hranga H/S dinhmun an thlirin, Lungsen H/S chu zirtirtu nei pachhe ber a nih thu an sawi bawk.

Sorkar nawr leh dodal zawngin Lungsen mipui an che ngai lo chu sorkarin a nuthûri zuam phah nia an hriat thu sawiin Lungsen NGO-te chuan, "Lungsena sorkar department hrang hrang pawhin harsatna an tâwk mek a, kan dikna chanvo hmu turin huai takin kan bei zel dawn a ni," an ti.

Lungsen H/S-a regular teacher pahnih, mathematics leh science zirtirtu sawn chhuah a nih avang leh zirtirtu nghet dah tura sorkar an phût avangin MZP Sub-Headquarters, Lungsen chuan Lungsen H/S-a sikul kai turte an lo dang tawh a; chumi hnuah NGO Coordination Committee hmalaknain Lungsena sikul zawng zawng an dang leh a ni.

An hmalaknain awmzia a la neih loh zel avangin August 29-30 ah sorkar pisa kai tur zawng zawng dang turin ruahmanna an siam a; chu chuan awmzia a la neih loh zel chuan August 31 aṭangin total bandh huaihawt leh an rél bawk.