All India service-a tlin tum turin chah 'Social media kan hman fimkhur a ṭul' - School Education Minister

School Education minister Lalchhandama Ralte chuan, social media hman fimkhur a ṭul thu sawiin, zirlaite chu all India service-a tlin tuma theihtawp chhuah turin a chah.

Chaltlang Higher Secondary School-in nimina zirlai thar lawmna leh Annual Sport khârna an buatsaih a hmanpuinaah thu sawiin Lalchhandama Ralte chuan, "Kan ramin mamawh tam tak a neih zingah all India service kan mamawh hle. Mizo thluak a ṭha kan ti ṭhin, ngati nge kum eng emaw chen all India service-a kan luh tawh loh tih hi chonaah hmang a, rilru siamna atan zirlaite'n hmang se ka duh," a ti.

Education Minister chuan, state ṭhenawm aṭangin all India service-ah an lut nawlh nawlh reng tih sawiin, "Hengte hi min béng harhtu ni rawh se. Hetiang zela kan kal chuan Mizoram sorkar hnuaia post pawimawh chief secretary, deputy commissioner leh a dangte hi hnam dangin an la luah vek mai ang," a ti a; zirlaite chu ram leh hnam mamawh chhànna nih tum turin a fuih.

Lalchhandama Ralte chuan, social media-ah thu dik leh dik lo finfiah loa dah mai chíng an tam thu sawiin, "Rin thute an sawi nasa. Thil dik hre hmasaa tih ṭhin a ṭha. Social media hi kan hmang duh a nih pawhin awmze nei taka hman tum a ṭul. Ram leh hnam kan vei a, siamṭhat kan duh a nih pawhin awmze nei tak leh inzirna tur leh insiamṭhatna tur lam hawia thil tih hrâm hrâm a ṭha," a ti.

Zirlaite hnam rilru pu tura chahin Minister chuan, "Mahni hnam leh culture ngainêp a, hnam dang culture-te ngaisang an awm ṭhin. Kan hnam leh culture-te hi Pathianin kan tana min pek a ni tih hriat reng tur a ni a, a chawi sangtu nih i tum ang u. Hnam dang hi thei bik leh ropui bikah ngaih loh tur," a ti a, zirlaite'n mahni hnampuite ngaisang turin ngaihtuahna hmang se a duh thu a sawi.

School Education Minister chuan, Covid-19 vangin zirna pangngai kum hnih chhung kalpui theih a nih loh thu sawiin, "Online hmangin theih ang angin zirna kalpui a ni a, course erawh a ngai vek. Tunah zirna pangngai kalpui leh ṭan a ni a, hun harsa kan tawh kha tumruhna, taimakna leh huaisenna atan in hman chuan hlawhtlinna in hmu ngei ngei dawn," a ti.

Inkhawm hi Chaltlang HSS lecturer C Laldinliana'n a kaihruai a, principal Lalrosangi Ralte-in an sikul dinhmun leh mamawhte a sawi a ni.