Thangpui P/S zirtirtu suspend a ni

Lunglei district-a Thangpui Primary School-a zirlai naupang saruaka hawtirtu zirtirtu, PC Lalbiakengi, SSA teacher chu nimin khan a hna aṭangin chawlhtir (suspend) a ni.

PC Lalbiakengi hi Lunglei District Education Officer chuan August 26, 2022 khan show cause notice a pe a, DEO pisaa kal tur leh hrem a nih lohna chhan tur sawifiah tura tih a ni. Nimin kha insawifiah tura tih hun a ni a, nimin vêk khan a hna aṭangin chawlhtir a ni.

School Education department hotute chuan, PC Lalbiakengi'n a tih loh tur a tih avangin a chungah hremna lek a nih thu an sawi.

Zirtirtute tan Right to Education-in eng nge a phût tih leh naupangte dikna chanvo (child right)-te hriat a ngaih thu sawiin Education department hotute chuan, "Danin tih tura a phût, tih theih chin hriat loh chuan ṭhahnemngai tak chungin chetsualna tur tam tak a awm a ni," an ti.

Tarlan tawh angin, PC Lalbiakengi thil tih danah hian District Child Protection Unit (DCPU), Lunglei-in an zinga thawktu pakhat hmingin Lunglei Police Station-ah first information report (FIR) an thehlut a, chuvang chuan August 27, 2022 khan police-in an man a ni.

PC Lalbiakengi lakah hian Juvenile Justice (Care and Protection) Act Section 75 tlawhchhanin thubuai ziah luh a ni.