Lunglei leh Siaha-ah SEDP hawn a ni ; SEDP-ah Rs 3,00,000 a tlin hma chuan Sorkarin pek zel a tum - C Lalrinsanga

Minister C Lalrinsanga, Lunglei West bialtu MLA chuan nimin khan Lunglei Convention Centre-ah Socio Economic Development Programme (SEDP) a hawng. Minister chuan, SEDP ṭanpuina chu Rs 3,00,000 a tlin hma chuan sorkarin pek zel a tum niin a sawi. Nimin vek khan MADC chairman N Viakhu chuan New Siahaa MYA Multipurpose Hall-ah SEDP a hawng. Siaha leh Palak biala SEDP dawng turin chhungkaw 3,000 thlan an ni.

Lungleia SEDP hawnna hi bawrhsap Kulothungan A-in a kaihruai a; Lunglei district-a MLA pathum - Lawmawma Tochhawng, Dr K Pachhunga leh Dr Vanlalṭanpuia te an tel. Lunglei district-a MLA bial paruk aṭangin SEDP thawh khatna dawng tur chhungkaw 9,000 thlan a ni.

C Lalrinsanga chuan, SEDP chu mirethei leh chhumchhiate khai chhuahna tur a nih thu sawiin, "Family oriented SEDP sum pek chhuah tur hi first instalment a ni a, instalment dang pawh pek leh thuai a ni ang. Rs 3,00,000 a tlin hma chu sorkarin pek zel a tum a ni," a ti a; buh leh bâl bakah, thlaia Mizoram a intohdelh theih nan ṭan lak a ngaih thu a sawi.

Lunglei DRDA project director M Misael tarlan danin, Lunglei district MLA bial paruka khua/veng tinah Village Level SEDP Committee 124 din a ni. SEDP ṭanpuina sum dawng turin department leh trade hrang hrang pakuaah chhungkaw 9,000 thlan a ni a, chu'ng mite hnena sum pek tur chu Rs 22,50,00,000 a ni.

Siaha-a SEDP hawnna inkhawm chu additional DC Donny Lalruatsanga'n a kaihruai a; N Viakhu chuan, SEDP hnuaia ṭanpuina sum sem tur chu chhungkaw 60,000 hnenah Rs 50,000 ṭheuhin a hmatáwnga sem tum a nih laiin, CSS sum pek chhuah a ngaih thut avangin Rs 25,000-a sem a nih tâk thu a sawi a, "SEDP kaltlangin Rs 3,00,000 kan la dawng vek dawn tho a ni," a ti.

MADC Chairman chuan, SEDP kaltlangin nasa takin hmalak a nih tawh nia sawiin, "Infrastructure lamah ram chhung kawngpui pawimawh zual siam nan te, ramri lam kawng laihnaah te, zirtirtu indaih loh zual phuhrûk nante leh thil dang tam takah hman a ni tawh," a ti a; SEDP ṭanpuina dawng hmasate chu la dawng ve lote tana entawn tlak ni tur leh rinawm taka thawka hlawhtlinpui turin a chah.

Siaha District SEDP Committee member secretary Abraham Beirazi Khithie tarlan danin, Siaha district-a MLA bial pahnih - Siaha leh Palak bialah SEDP dawng turin a thawh khatnaah chhungkaw 1,500 ve ve, a vaiin chhungkaw 3,000 thlan a ni.

Chhungkaw 3,000-te chu AH&Vety department hnuaiah 2,164, Agriculture-ah 128, Commerce & Industries-ah 435, Fisheries-ah 49, Horticulture-ah 190, Land & Resource-ah 13, UDPA-ah 19 leh Sericulture-ah chhungkaw pahnih an ni.