Hnahthial ṭhalaiin BDO sawn an phut
Hnahthial Ṭhalai Pawl (HṬP) chuan nimin khan thuthar thehdarhtute Hnahthialah an kawm a, sum hmang ṭha loa an puh Hnahthial BDO Lalneihthanga sawn turin sorkar an phut thu an sawi.
HṬP president J Lalhmunmawia chuan Hnahthial khawtlang tih hmasawnna tur sum chu a hmanna turah ṭha taka hman a nih loh ṭhin thu sawiin, "Ṭha taka hmang tura kan ngen hnuah pawh BDO hian a zawm duh lo. Hei hi Hnahthial mipui zah lohnaah kan ngai a, BDO ni chhunzawm zel tlakah kan ngai lo. A rang lama kan district chhuahsan tir turin sorkar kan phut a ni. September ral hmaa transfer order kan hmu lo a nih chuan BDO office kai dang tura hmalak a ni ang," a ti.
J Lalhmunmawia chuan February, 2022 khan BDO hi a pisaah lenchilhin, MGNREGS material component atanga block employment council (BEC) hnathawh hrang hrangte an sawipui tih tarlangin, "Technical assistant (TA) leh BDO-ten tun hma aṭangin BEC hnathawh work estimate aṭanga sum sanction aṭangin 50% leh a hnuai lama hna thawh ṭhin a nih thu an sawi a ni," a ti a, a chhe berah 70%-80% tala thawk tawh tura an ngen thu a sawi.
Kum 2021-a BEC hnathawh hrang hrang estimate aṭanga pawisa sanction aṭangin 50% leh a chunglam chuang awm ngeia an hriat avangin BDO hnenah lehkha pein Model Vengah side drain leh Electric Veng volleyball court-ah ṭhutna leh pavilion siam turin an ngen thu sawiin HṬP President chuan, "BDO hian kan ngennate hi material component-ah cheng nuai 2.5 ve vea thawh turin a lo thun a ni. BEC sum tam tak bang awm ngei nia kan hriat laia material component-a thawh tura a ti hi a dik lo a ni," a ti.
HṬP hruaitute sawi danin, March 23, 2022 khan BDO hi a pisaah an hmu leh a, cheng nuai 2.5 hu hna lo siam turin a lo hrilh a ni. Hemi bawhzui hian April 18 khan Hnahthial khaw chhung hmun pasarihah solar street light dah turin BDO hnenah lehkha an thehlut leh a ni. April 23 tlai lamah an OB pakhatin BDO hnen aṭangin a PA kaltlangin envelope an dawng a, pawisa a ni tih hriat a nih hnuah hemi zan la la hian emergency OB meeting neih a ni a, pawisa hi pek let leh nghal a ni.