National Sports Day hman a ni

Sports & Youth Services (SYS) chuan nimin khan Mission Vengthlanga SAI Contact Sports Centre-ah National Sports Day an hmang a, SYS minister Robert Romawia Royte-in a hmanpui. Minister chuan, tun hnai kum thum chhungin infiamna ruhrel tihchangtlunna atan SYS department-in cheng nuai 45,000 vel a hmuh thu a sawi.

Robert Romawia Royte chuan, infiamna leh zirna a kal kawp a ngai a, chu chu National Education Policy, 2020 pawhin a ngai pawimawh tih sawiin, "Tun hma chuan sport hi co-curricular activity kan ti ṭhin a, tunah erawh chuan curricular activity zingah telh a ni tawh. Tun hnai kum thum chhungin SYS department hian infiamna ruhrel tihchangtlunna atan cheng nuai 45,000 vel kan hmu tawh a, heng hmang hian kawng hrang hrangin hma kan la mup mup a ni," a ti.

Covid-19 hripui léng vangin kum hnih chhung duh angin hmalak theih a ni lo tih sawiin Robert Romawia chuan, "Kan dinhmun a ziaawm tâk hnu hian theihtawp chhuahin ṭan kan la a, infiamna hrang hrangah ṭhalaite'n hma an sawn a, India ram leh khawvel huap pawhin hming kan chher chho zel hi a lawmawm tak zet," a ti a; ṭhalai infiammite tan theihtawp an chhuah zel dawn tih a sawi.

National Sports Day pual hian Mizo Indigenous Games Association chuan Mizo infiamna hrang hrang hmangin inelna an buatsaih a; Synod Higher Secondary School NSS volunteer-te leh Sports Authority of India (SAI) enkawl lai infiammite an tel a ni.