SEDP hi cheng nuai thum dawnah a tàwp mai dawn lo - Robert Romawia

MNF adviser leh minister of state Robert Romawia Royte chuan, SEDP chu Rs 3,00,000 dawnah a tàwp mai dawn lo a, MNF an sorkar chuan an kal zel dawn tih a sawi.

Nimina Mizo Hnam Rúna inkhawmah thu sawiin Robert Romawia chuan, Covid-19 a reh chho a nih chuan kum tharah chuan Mizoram budget a pun ngei a rinawm tih a sawi a, "SEDP-a kumina kan cover loh hi nakkumah pawh kan cover vek theih a rinawm. SEDP hi nuai thum dawnah hian a tàwp mai dawn lo a, kan sorkar chuan kan kal zel dawn a ni," a ti.

Tourism minister Robert Romawia chuan, international tourism mart an siam dawn tih sawiin, "A scheme hi nuai 4,000-a bul ṭan turin tun September thla hian a lungphùm kan phúm dawn a ni," a ti a; Khamrangah cheng nuai 800 hmangin village eco-tourism din tum a nih thu a sawi.

Robert Romawia chuan, field chhâwng tih chu fiamthu thawh nan miin an hmang tih sawiin, "Zarkawtah tih tura ruahman a ni a, mahse, khawtlang neitu lamin an remtih chiah loh avangin Armed Vengah hmalak mek a ni a, chhawng liin Mizorama building lian ber ni turin hmalak mek zel a ni," a ti.

Lungphùm an phùm tawhnaah hmalak zel a nia sawiin Robert Romawia chuan, "Phûl lem kan phah hnem poh leh Mizoram sorkarin tax a la hnem a, kan hlâwk phah viau a ni. Sport-ah vaibelchhe 1,250 project kan siam mek. PMJVK hian district pathum chiah a huam ṭhin a, tunah chuan district zawng zawng a huam vek tawh," a ti a; lungphûm la phûmna tur hmun 17-ah an la neih thu leh opposition MLA-te pawhin an biala phûl lem phah turin amah an sih rûk neuh neuh thu

a sawi.

MNF Adviser chuan, an party-in a tirah MLA 26 an nei a, 28-ah an pung chho leh thei niin a sawi a; ZPM chu 2018 inthlanah an vung em em a, tunah erawh chuan an hniam zel thu leh, Congress party chu central leh Mizoramah an buai hle thu a sawi bawk.