Champhai dist-ah CD ratio target khûm

Champhai District Consultative Committee (DCC) chu nimin khan an chairman James Lalrinchhana, bawrhsap kaihhruaiin an ṭhukhawm a, April-June 2022 chhungin Champhai district-a bank-te credit deposit ration (CD ratio) 70.42% a ni a, target 60% chu 10.42%-in an khûm tih tarlan a ni.

Ṭhutkhawmah hian Champhai district-a RD block pahniha bank leh stakeholder-te hmalak dan thlir lêt a ni a; tarlan danin, kumin April-June chhung khan Champhai district-a bank hrang hrangah cheng nuai 45,930.60 dah luh (deposit) a nih laiin, cheng nuai 32,344.90 pek chhuah a ni a, CD ratio chu 70.42% a tling.

Priority sector atana target 6,884 (cheng nuai 14511.51) aṭangin 909 (cheng nuai 1940.06), a vaiin 13.36% tihhlawhtlin a ni a; non-priority sector-ah target 159 (cheng nuai 3,300) aṭangin 71 (cheng nuai 1466.09), a vaiin 44.42% tihhlawhtlin a ni.

PMMY kaltlangin Sishu hnuaiah mi pakua, Kishore hnuaiah mi 46, Tarun hnuaiah mi 17 leh Stand-up India hnuaiah mi pasarih hnenah loan cheng nuai 219.57 pek a ni a; PMJDY hnuaiah mi 21,173, PMJJBY hnuaiah mi 10,304, PMSBY hnuaiah mi 18,506 leh APY hnuaiah mi 698 an inziak lut tawh.

DC James Lalrinchhana chuan, district ṭhang turin banking-a ṭhan a ngaih thu sawiin, "Bank mamawha dawr ṭhintute thliar bik nei loin lo dawngsawng ṭhin ang che u," a ti a; mipuiin tlangnél leh ngaihngam taka bank an dawr theih nan inhawng turin a chah.

RBI, Aizawl manager Siddharaj pawhin thu sawiin, Champhai district chu bank-a sum dah luh leh mipui tana loan pek chhuah inthlauhna zím ber, CD ratio nei ṭha ber district a nih mek thu a sawi.

Champhai district-ah hian bank hrang hrang branch 17 a awm a, ATM booth pakua, business correspondent pariat, CSP pakhat, IPPB hnuaiah banking touch point 26 leh financial literacy centre pahnih a awm mek a ni.