Sum hmangin mipui thlan sorkar BJP-in an tichhe mek - AAP Mizoram

Aam Admi party (AAP), Mizoram hruaitute chuan nimin khan Aizawl Press Club-ah thuthar thehdarhtute an kâwm a; BJP-in state hrang hrangah sum hmangin mipui thlan sorkar an tichhe mek niin an sawi.

AAP, Mizoram vice president Lalngaihawma Pachuau chuan, BJP-in mipui sum hmangin MLA-te an thlêm a, an lei ṭhin tih sawiin, "Maharashtra, Goa, Karnataka, Assam, Madhya Pradesh, Bihar leh Arunachal Pradesh sorkar an tichhe mek. Mipuite’n duh tak leh beisei sang taka an thlan sorkar chu sum hmangin an tichhe mek a, MLA lei nan pawisa tam tham tak an sêng mek a ni," a ti.

Lalngaihawma Pachuau chuan, BJP-te'n MLA 277 an lei tawh nia sawiin, "CBI/Enforcement Directorate chhui pawh an hlau tawh hial a ni. MLA leina atan hian cheng vbc. 5,500 lai an séng tawh. Delhi-ah ngei pawh BJP hian AAP MLA lei nan cheng vbc. 800 chuang an theh chhuak a ni," a ti a; Delhi-ah hian MLA 40 neih ngei tumin BJP-te'n sum nen theihtawp an chhuah thu a sawi.

Mi narànte'n thi leh thau pawlha an thawh chhuah aṭanga chhiah an chhûn luh pawisate chu BJP-in nasa takin an duh duhnaah an hmang nia sawiin Lalngaihawma chuan, "Chutih laiin, an ṭhian billionaire-te chhiah an ngaidam leh si. Kum 2014 khan diesel man Rs 54 a ni a, tunah Rs 90 a ni a, kum 2014 khan petrol Rs 60 man a ni a, tunah Rs 110 a ni mek," a ti.

Mizoram AAP hruaitute chuan, India ram hmun hrang hrangah thil man a pung nasa nia sawiin, "A ṭhente phei chu a lêt hnih/thum ten a pung hial. He inflation hian GST a tisang em em a, GST aṭanga pawisa lut hi khawiah nge a awm a, eng atana hman nge a nih?" an ti a; BJP-in mi hausate an duhsak em em laiin, mi rethei zawkte sum an sâwk nasa hle niin an sawi bawk.