Hripui vei enkawl mek zat a tlahniam

August 28, Pathianni khan Mizoramah Covid-19 vei mi 21 hmuh chhuah a ni a, August thla chhungin mi 4,064 hmuh chhuah a ni tawh. Nimin khan hripui vei dam tawh mi 156 chhuahtir an ni a, Covid-19 vanga thi an awm lo. Hripui vei enkawl mek zat a tlahniam hret hret a, nimin tlai khan mi 433 an awm.

Pathiannia Covid-19 positive hmuh thar mi 21-te chu mipa 12 leh hmeichhia pakua an ni a, rapid antigen test hmanga hmuh chhuah vek an ni. Swab sample endik zat 54 aṭanga positivity rate chu 38.89% a tling a, thla khat chuang hnua positivity rate a sàn ber ṭum a ni.

Covid-19 vei zinga dam tawh mi 156 chu nimin khan chhuahtir an ni a; district tina chhuak zat chu - Aizawlah mi 62, Lungleiah 28, Lawngtlaiah 18, Mamitah 14, Kolasib-ah 11, Serchhipah pasarih, Hnahthialah panga, Saitualah pali, Siaha leh Champhaiah pathum ve ve leh Khawzawlah pakhat a ni.

IDSP record angin, Mizoramah Covid-19 vei 2,36,864 hmuh chhuah a ni tawh a, mipa 1,10,304 leh hmeichhia 1,26,560 an ni a, mipa aiin hmeichhia 16,256-in an tam zawk. Nimin tlai dar 5 thleng khan mi 2,35,711 (99.51%) chhuahtir an ni tawh a, mi 720 (0.30%) thi tawhin, enkawl mek mi 433 (0.19%) an awm.

Kum 2011 chhiarpui angin, Covid-19 vei hmuh tawh 2,36,864 chu state mipui zat aṭangin 21.59% a tling a, India rama state zingah a sang ber. Mi 1,000 zelah positive 215 an awm tawh ang a ni a, hripui vangin mi 1,00,000 zelah mi 65 an thi tawh ang a ni bawk.