KHAWTHLIR

Meth mûm 10,100 man
Champhai police-te chuan August 28, Pathianni khan Champhai aṭanga Aizawl pan tur lirthei (Scorpio) aṭangin methamphetamine mûm 10,100 (kg. 1.1) an man a, lirthei neitu leh ruihhlo kawltu Vanlalringi (42) d/o Thangluaia, Champhai Zion Veng an man bawk. Meth an man hi international market-ah cheng nuai 330 man a ni.

MRB Customer Connect Month
Mizoram Rural Bank chuan September 27, 2022-a kum 40 a tlinna tur pualin kumin September thla chu Customer Connect Month-ah an puang. Customer Connect Month-ah hian pensioner, mi chi hrang hrangte tan MRB pisa leh branch hrang hrangin ruahmanna an siam dawn a ni.

Sa rêp leh pickle Siam zirtir
ICAR Research Complex for NEH Region, Mizoram Centre chuan nimin khan Mamit district-a Vawngawnzo khuaah DBT Biotech KISAN hnuaiah 'Meat processing and value added pork product' tih hmangin training an buatsaih. Zirhonaah hian mi 24 an tel a, vawk sa rêp dan leh pickle siam dan zirtir an ni.

Scout & Guides
Serchhip District Scout & Guides Council chu an president Nazuk Kumar, bawrhsap kaihhruaiin nimin khan DC conference hall-ah an ṭhukhawm a; kumin atana hmalak dan tur hrang hrang an rel. Meeting-ah hian unit thar din belh dan tur, scout master & cup master training, joint hiking, camp fire, social work day leh sum tuak dan turte an sawiho a ni. Meeting hi Scout & Guides state secretary Lalngilneia Kawlni-in a telpui.

Hulhliap hawng
AMC Ward No. VIII councillor Christina Roluahpuii Sailo chuan nimin khan a ward chhung Armed Veng leh Armed Veng South Taxi Stand bula AMC Property Tax Return aṭanga taxi driver leh an passenger turte chawlh hahdamna atana hulhliap siam chu a hawng. Hulhliap siam hna hi veng pahnih taxi welfare-te'n an thawk a ni.