Beidawnna ruamah sorkarin min hnuh luh kan hlau - SDIDC

Saitual District Implementing Demand Committee (SDIDC) hruaitute chuan, Saitual district puan tawh tipuitling turin sorkarah rinna an la nghah thu an sawi rualin, "Beidawnna ruamah min hnûk lut ang tih kan hlau," an ti.

SDIDC hruaitute hian nimin khan Aizawl Press Club-ah thuthar thehdarhtute an kâwm a; an chairman Rohmingliana chuan, Saitual chu a dintu lal Dorawta'n Kristiante tlân khawmna atana a din a nih thu sawiin, "District tihpuitlin nawrna atan hian khaw dang tih angin ti châk viau mah ila, kan khaw din chhan nen tih a rem ve lo," a ti a, district tihpuitlin an nawr tawh chinah muanawm taka thil an kalpui zel thu a sawi.

Kum 1974 aṭangin district headquarters an nawr thu sawiin SDIDC hruaitute chuan, "Tun thlengin kan la nghak chhuak lo. Beidawnna ruamah min hnûk lut ang tih kan hlau. A full-a function tir nghal rup a harsa mai thei, bul ṭan erawh a theihah kan ngai. Sum harsat loh hun tak tak a a awm lo, sorkar hian a duh chuan a thei ang," an ti.

SDIDC hruaitute sawi danin, Saitual hi district headquarters dil hmasa ber an ni a, kum 1974-ah an dil tawh. Beiseina sang tak nei ṭhin mah se, an beisei ang an hmuh ṭhin loh avangin nunau mai ni lo, patling thlengin an mittui a far ṭhin. Saitualin district an dil tih hriat vanga district headquarters dil ve eng emaw zat chu sorkarin a tihpuitlinsak tawh.

Kum 2008 inthlan dawnah Indian National Congress (INC) vice president Rahul Gandhi, MPCC president Lal Thanhawla leh bialtu MLA R Lalzirliana ten Congress party thlan tlin a nih chuan Saitual district chu tihpuitlin an tiam tawh a ni.

Saitual district-in a huam chin atan hian SDIDC chuan Aizawl district-a MLA con­stituency pathum Ṭawi, Tuivawl, Chalfilh leh Champhai district-a Lengteng constituency-te an beisei.

Zawhna chhangin SDIDC hruaitute chuan, "Tun hnaiah chuan khaw hrang hrangah Saitual district-a an awm duhna lehkha lak a ni tawh lo. District dang din a nih pawhin a huam tur khuate pawmpuina sorkarin a phût kher kan hre lo a, a duh chuan sor­karin a ti thei. Constituency pali kan beisei zing­ah Darlawn tlangdung erawh kan beisei sang lutuk lo," an ti.

Sorkarah an la beidawn loh thu sawiin SDIDC hruaitute chuan, "Kan sorkarah hian rinna kan la nghat tlat. Mahse, kan hun tiam August 12, 2017 ral hmaa district tihpuitlin a nih loh chuan sorkara rinna kan nghat tawh lo ang," an ti a; an hun tiam a ral chuan na zawka an kal tawh tur thu an sawi.

SDIDC hruaitute chuan, district tihpuitlin chungchangah nimin khan Chief Minister an hmu tih sawiin, "District Re-organisation Committee din a nih tawh avangin Chief Secre­tary hmu turin min ti a. CS kan hmu a, ani chuan an report sorkarah an thehluh tawh avangin engmah tih theih an neih tawh loh thuin min lo chhang. Bialtu MLA pawh kan hmu a, ani chuan a tawp thlenga min puih a tum a ni," an ti.