Lunglei Police-te ṭan lak tum dan sawifiah

Lunglei SP J Lalṭhafamkima chuan nimin khan Lungleiah thuthar thehdarhtute a pisaah a kâwm a, Lunglei police-te ṭan lak tum dante a sawifiah.

J Lalṭhafamkima chuan, Lunglei district-ah crime rate hniam mah se, rûkrûk a tam avangin mipuite'n thil zawrh an lei dawnah finfiah hmasa ṭhin se a duh thu a sawi a, "Rûkrûk thil leitu chu a rutu ang bawka hrem theih an ni a, rûkrûk thil leitute chu dan angin man zel an ni tawh dawn. Hei hi mipuiin fimkhur nan an hman phah ang a, case pawh a tlem phah ka beisei," a ti.

POSCO Act-ah case an nei leh zauh ṭhin chu pawi a tih thu sawiin Lunglei SP chuan, "Human rights network leh child welfare organization-in zirtirna hrang hrang nen hmalak a ni," a ti a; naupang kumtlinglo tihbawrhbân a tlem theih nan thuthar thehdarhtute chu thawhpuiah a sáwm.

Lunglei SP chuan, traffic dan bawhchhia an tam thu sawiin, "Man leh chawitir hi police thil tum ber a ni lo a, kawngpui hmangtute him zawk nan leh chetsualna laka mipui an fihlim kan ngai pawimawh a ni," a ti.