Ram hmasawnna turin mi tinin Mawhphurhna an nei vek - CM

Mizoram Mistiri Association (MMA) chuan nimin khan Chanmari YMA Hall-ah an din champha vawi 10-na an lawm a; khuallian, chief minister Lal Thanhawla chuan, ram hmasawnnna turin mi tinin mawhphurhna an neih vek thu a sawi.

Chief Minister chuan, ramin hruaitu ṭha a mamawh rualin, hruaitu ṭhate'n mipui ṭha an mamawh ve tih a sawi a, "Ram hmasawnna turin a chhunga chêng hna hrang hrang thawktu te, nihna hrang hrang chelhtu te, sorkar hnathawk leh kut hnathawktute chuan mawhphurhna an inpeizàwn vek a ni. Ram hruaitu ṭha leh mipui thil ṭha duhte'n ram hmasawnna nasa zawk an siam thei a ni," a ti.

Mistiri hna chu Mizoram mai ni lo, khawvel hmun hrang hrangah mi tin mamawh leh hna pawimawh a nih thu sawiin CM Hawla chuan, "Tun hmain kan ramah kan thawh theih thawh nacháng kan hriat loh avangin kan sum tham tam tak kan rama chámbáng thei turte state páwn lam mite'n rût fai vekin an hawn thla ṭawk ṭawk a ni," a ti a; sorkar hmalakna leh YMA  ṭhahnemngaihna zarah Mizote'n hnam dang thawh ṭhin an thawh ve theih tawh thu a sawi.

MMA-ah hian member 1,700 awm mek a, Mizoram chhungah branch 50 an nei. MMA-te hi TNT, Ṭawngṭai Bethel Camping Centre, Aizawl Civil Hospital, State Referral Hospital, Mizoram State Cancer Institute, Together in Christ, Melthum leh hmun hrang hrangahte an lo hnatlang tawh ṭhin a ni.