Ram leh hnam thilah political party leh NGO-te ṭan rual a ṭul - ZNP president

ZNP president Lalduhoma chuan nimin khan a pisaah thuthar thehdarhtute a kâwm a; Mizo ram leh hnam thilah Mizorama political part leh tlawmngai pawl hrang hrangte chu mahni pawl hamṭhatna tur ngaihtuah loa ṭan ho a ṭul thu a sawi.

Lalduhoma chuan, ram leh hnam pum nghawng thei thilah pawh ṭangrual thei lo khawpa mahni pawl bil hamṭhatna leh lalna ringawt dah chungnunna vangin thil pawi tak tak a thleng tawh ṭhin tih a sawi a, "Kan zavaia sorkar chakna nena kan beihho tur ni âwm tak thilah pawh sorkar leh a police-te kan hmachhawn zawk hlauh chángte pawh a awm fo," a ti a; pawl hamṭhatna aia ram leh hnam dah chungnung zawk turin party leh NGO zawng zawng a ngen.

Chakma chungchangah ṭan rual a ngaih thu sawiin Duhoma chuan, "Sorkar uapna hnuaiah party leh NGO tinte thawhhona huang siam phawt mai ni se," a ti a; MNF President-in NGO-te duh dana kum 2018 Assembly inthlanah Chakma candidate an neih loh tur thu a puang chu lawmawm an tih thu a sawi.

ZNP President chuan, July 19, 2016-ah Parliament-ah Citizenship Amendment Bill pharh a ni tih sawiin, "Tunah hian Joint Parliamentary Committee kutah dah mek a ni a, Parliament thlasik ṭhutkhawmah put luh hman a nih rin a ni," a ti a; he Bill hi Mizoramin a dodal a ṭul thu a sawi.

Lalduhoma sawi danin, Citi­zenship Amendment Bill ang chuan, Afghanistan, Bangladesh leh Pakistan aṭanga Hindu, Sikh, Buddhist, Jain, Parsi leh Kristiante chu India rama an lo luh chuan ûm chhuah loh tur a ni a, kum 6 hnuah Indian citizenship pek theih an ni ang, tih a ni. Muslim-te a huap ve loh avangin India ram chu Hindu rama siam tumnaah an ngai a, Myanmar a huap loh avangin Kristiante tan awmzia a nei lem loah an ngai bawk.

Citizenship Amendment Bill chu pass a nih chuan, Chakma-te chu Buddhist an nih avangin Mizoram (India) aṭangin hnawhchhuah a theih dawn loh a, kum 6 an awm chuan khua leh tui nihna pek an ngai dawn tih sawiin Duhoma chuan, "Hemi chungchangah hian ngaihdan thuhmun neia Joint Parliamentary Committee hnena bawhzui vat a ṭul," a ti.

Bru chungchangah Lalduhoma chuan, tun aia zau zawk leh inpawh zawka political party leh NGO zawngzawngte'n hma an lakho zel a ngaih thu a sawi a; zu chungchangah pawh party mala thutlukna an siam lo a, party leh NGO-te bakah, kohhrante nena sawiho phawt hnua thutlukna siam a ṭha bera an hriat thu a sawi bawk.

EVM chungchangah inpuh tawnna a awm tawh loh nan sawi­hoa ngaihdan hrual mûm a ṭul an tih thu sawiin Lalduhoma chuan, "Nakkuma inthlanna lo awm turah hian Election Commission of India hnenah duh dan thuhmun kan thlen a hun," a ti.

Zawhna chhangin, EVM chu inhnialna titamtu a nih thu sawiin, "EVM hi rigged a ni kan ti thei lo a, rigged a ni lo pawh kan ti thei lo. EVM hman loh erawh kan duhthusam zawk a ni," a ti.

Mizoramin tuna ramri a buaipui dan chu ṭhenawm state-te tan duhthusam a nia sawiin Duhoma chuan, "Hrui khat vuana ke kan pênho ngei ngeina tur a ni," a ti bawk.