Enkawl an nih danah PAMRA an lungawi lo

Peace Accord MNF Returnee Association (PAMRA) chuan, kum 1986-a MNF leh India sorkar inremna vanga MNF rammû hawte sorkarin a enkawl danah an lungawi loh thu an puang.

PAMRA hruaitute hian nimin khan Aizawl Press Club-ah thuthar thehdarhtute kâwmin, an dinhmun leh sorkara an thil phûtte an puang a; an president B Zorampara chuan, inremna vanga MNF rammu hawte chu sorkarin Maumualah in hmun a pe tih a sawi rualin, tu'ma chen duh lohna hmun a nih avangin 'sa ṭah chhuak pek' pawh a tluk lo niin a sawi a, "Mizo hnam sipaite hetiang em ema Mizoram sorkarin min ngaihsak lo hi kan rilru a ná a ni," a ti.

MNF rammute eizawnna tur chungchangah Zorampara chuan, Mizoram sorkarin rûn dâlah a tihsak a, mahse, an la nei kim lo a, sorkarin a ngaihsak chhunzawm lo niin a sawi.

PAMRA hruaitute'n zawhna an chhan danin, Laldenga chief minister nih laiin PAMRA member 100 chuang hna pek an ni a, Lal Thanhawla CM hmasak hunah mi 100 chuang bawk pek an ni. Zoramthanga kaihhruai MNF sorkar chhungin mi 285 sorkar hna pek an ni a, Lal Thanhawla a CM leh chhungin mi 70 sorkar hna pek an ni bawk. Tun dinhmunah sorkar hna la pek loh chhungkua 13 an awm.

PAMRA hruaitute chuan, political party thlawp bik an nei lo a, eng party pawh sorkar se, an chanvo an hmuh theih nan an nawr zel tih an sawi a; chutih rualin, B Zorampara chuan, "MNF sorkarah khan beiseina 100% kan nei a, mahse, MNF sorkarah khan kan chanvo pek phûtin chaw kan nghei," a ti.

Inremna vanga hawte chenna tur in sak chungchangah Mizoram sorkar chu hma la ṭha duh loah an puh a, "Kan dawh rei tawh a, tâwk kan ti hle tawh a. Mizoram sorkar hmalakna azir zelin hma kan la ve ang," an ti a; remna leh muanna a theihna tura haw hnam sipai te, nunna chán chhungte leh kuttual leichhama awmte tan sorkarin budget-ah dah se an duh thu an sawi.

PAMRA hruaitute chuan, an ngenna anga sorkarin Peace Accord Review Committee a din chu lawmawm an tih thu sawiin, "Chak taka hma la turin kan ngen a ni," an ti a; CM Lal Thanhawla chu puitling an tih thu sawiin, NLUP-ah pawh min duhsak hle a, a chungah beiseina sang tak kan nei a ni," an ti.

PAMRA President chuan, vawiin August 2 hi inremna thuthlung ziah hnua MNF rammu hawte'n kum 1986-a Remna Rûn an luh champha a ni a; he ní hi Remna Rûn Day tih vuahin, vawiin hian Aizawl leh district khawpui dangahte hman an tum a ni.