MIMER din tura hmalaknate sawiho

Mizoram Institute of Medical Education & Research (MIMER) dinna kawnga tun thlenga hmalak tawhnate chu Thawhṭanni khan Health minister Lal Thanzara hoin a pisaah sawiho a ni a; principal adviser to chief minister R Lalrinawma, Health secretary Lalrinliana Fanai leh Christian Medical College, Ludhiana director Dr Abraham G Thomas te an tel.

Health Minister chuan, Health department sàwmna ngai pawi­mawha Dr Abraham Thomas-a'n MIMER dinhmun enpui tur leh thuràwn pe tura Mizorama a lo zin chu lawmawm a tih a sawi a; a hma thei ang bera MIMER ṭan a nih theih nana tih ṭul pawimawh hmasa leh hmachhawpte bul ṭanna turah hma lakpui a, sorkar thuràwn pe zel turin a sáwm.

Dr Abraham Thomas chuan, MIMER atana sorkarin hma a lak tawhte chu ṭha tâwk viaua a ngaih thu sawiin, "Medical college din hi thil hautak ni mah se, Mizoram ang state, mahnia medical college la nei lo tan chuan thil ṭul leh pawimawh tak a ni," a ti.

Medical Council of India (MCI) pawhin medical college thar dinna tur chu a duh uluk a, a hnathawh pawh enfiahna (inspection) ṭum 5-6 lai an neih thin thu sawiin Dr Abraham Thomas chuan, "A tira inspection-a tlak palh pawhin, chu'ng chu siamṭha turin thâ thlah loa theih­tawp chhuah zel a pawimawh," a ti a; MIMER bul ṭan kum khatnaah anatomy, physiology leh biochemistry subject zirtir turin CMC, Ludhiana aṭangin faculty an tirh thei thu a sawi.

Sorkar thuchhuah tarlan danin, MIMER dinna tura Mizoram sorkarin hma a lak meknaah mithiam tawnhriat nei tawhte an ráwn zel a, meeting pawh hi chutianga an hmalakna pakhat a ni. MCI aṭangin inspection vawi khat an nei tawh a, kumin kum tawp lamah MCI inspection team-in an enfiah leh tura beisei a ni.

Medical college dinna tur sum hi sorkar laipuiin 90% a tum ang a, state sorkarin 10% a tum tura ngaih a ni a, mahse, thawktute hlawh leh a enkawl zuina chu state sorkar kutah dah a ni ang. MCI duh dan angin MIMER-ah hian zirlai 100 awm thei tura ruahman a ni a, doctor zirlai zat milin OPD-a inentir theih zat te, khum awm tur zat te, khawl leh hmanrua awm tur te, building awm tur zat te, zirtirtu leh thawktu dang awm tur zatte hi MCI-in a bithliah sa a ni.