MNYF-in mipui bum tumna awmin an hria

MNYF ṭhalai headquarters chuan thuchhuah siamin, tun hnaia Mizoram quota-a MBBS/BDS zir tura Chakma zirlaite dah an nih chungchangah Mizoram mipuite bumna lian tak leh, bum leh tumna a awma an hriat thu an tarlang.

MNYF chuan, July 19, 2017-a Chakma zirlaite counselling neihtir tur ṭhulh a nih laia a tûk July 20-a sorkar venhimna hnuai­a counselling neihtir an ni leh si chu sorkarin mipui a bumna a nih thu an sawi a, "Chakma zirlaite tirh an tumzia tilang chiangtuah kan ngai," an ti.

MZP-in an dodal hnuah counselling neih tawh sa ṭhiata a thara tih leh vek tur a nih thu puan a ni leh, July 26-a Higher & Technical Education minister R Romawia'n category-I chu a ram leilung fa Mizote tan chauh dah a nih tur thu a sawi avangin Zoram mipui an lawm hle tih sawiin MNYF chuan, "Tun thleng­a counselling nei tawhte cancel thu leh counselling neih ṭhat leh thu hriat tur a la awm lo hi a ngaih-ṭhatthlak loh a ni," an ti a; a rang lama counseling nei ṭha leh turin sorkar an phût.

MNF ṭhalaite chuan, July 31, 2017-a Rajya Sabha session-a Karnataka aṭanga BJP MP Basawaraj Patil-a'n Mizoram Chakma thlavâng a hauh laia Mizote'n thlavang hauhtu an nei lo kha rilru natthlak an tih thu sawiin, "Mizoram aiawha Rajya Sabha-a MP kan neih chhun Ronald Sapa Tlau hi Mizote thlavang hauh a ṭul lai khan khawiah nge a awm, Mizote tana ding MP a ni ta lo em ni, tih hi kan zawhna a ni," an ti.