Swatchhta Pakhwara hman ṭan a ni

Sorkar laipuia Ministry of Youth Affairs & Sports hnuaia Nehru Yuva Kendra Sangathan hmalaknain ram pumah ‘Swatchhta Pakhwara’ (Swatchhta Fortnight) 2017 chu nimin khan hman ṭan a ni a, Mizoramah pawh district tinah hman a ni.

Chawlhkar hnih awh tur ‘Swatchhta Pakhwara’ chhung hian NYK chuan National Service Scheme, National Cadet Corp leh ṭhalai pawl dangte nen faina leh thianghlimna kawng­a mipuite zirtirna leh hna­tlang an nei dawn a ni.

RD Block tinah in-charge turin volunteer mi 70-te'n hmalaknate chu an ho dawn a, Swatchhta Pakhwara puala Prime Minister leh Union Youth Affairs & Sports Minister-te thuchah bakah, faina chungchanga Mahatma Gandhi thuziahte mipuiin an hriat theih nan chhiar chhuah ṭhin a ni ang.

Khawtlanga mi pawimawh leh mithiam­te sáwmin, hmun hrang hranga youth club leh ṭhalaite infuihna hun hman tum a ni bawk a; faina chungchang mipui­te inzirtirna kawngah in tina luta campaign neih bakah, khawlai hmun langsarah mipuite chhiar theih turin banner-te tàr tur a ni bawk.