Khung hran leh endikna sênso Sorkarin a tumsak tawh dawn lo

State Disaster Management Authority (SDMA) hnuaia State Executive Committee (SEC) chairman Lalnunmawia Chuaungo, chief secretary chuan July 20, 2020 khan hriattirna (notification) chhuahin, state páwn aṭanga rawn hawte in­khung hranna leh sample endik chungchanga sorkar thutlukna thar a puang a; hriattirna chhuah ní aṭangin hman ṭan nghal a ni.

Notification chuan, Ministry of Home Affairs-in June 29, 2020-a order a chhuah dung zuiin Mizoram sorkarin inkhàrkhip burna thlah zalen deuhna tur order June 30-ah a tihchhuah thu te, May 25 aṭanga thlawhna thlawh chhunzawmtir a nih thu te, state chhungah mipui tan zin veivah a awlsam tâk thu te, Mizoram mi state páwna tangkhangte lâk luh kim thawkhat a ni tawh rualin, state páwn aṭanga lo lut leh Mizoram mi zin chhuaka lo haw lehte pawh an ṭhathnem zel thute a tarlang.

Hriattirna chuan, hnathawhna leh mimal ṭul thila Mizorama rawn lut leh zin chhuaka lo lêt lehte khung hran leh an hriselna dinhmun enfiahna kawnga sorkar a insènso reng chu ṭul tawh loa hriat a nih thu tarlangin, "Chuvangin, he thu chhuah ní aṭanga thu leh awm hma chu state páwn aṭanga Mizorama rawn lutte chuan an quarantine leh test senso an intum ve tawh ang," a ti. Mizoram sorkar chuan quarantine facility-a awm man leh ei leh in man a bithliah nghal a, swab sample endik man erawh chu bithliah nghal loin, Health & Family Welfare (HFW) department rate siam anga kalpui tur a ni. Hetih lai hian, zawhna chhangin HFW department hotute chuan, swab sample endik man an la bithliah loh thu an sawi.

Quarantine facility-a awmte zingah Covid-19 vei rinhlelh an awm chuan a rang thei ang berin duty-te emaw medical helpline 102/0389-2323336/ 0389-2318338-ah hriattir tur a ni. Khung hrante chu an chhuah hmain an hriselna endik a ni ang a, hripui an vei lo tih finfiahna result tel loin chhuah phal a ni lo.