Cabinet-in grape wine siam a remti ; Samagra-te hlawh tihpun a ni dawn

Chief minister Zoramthanga hoa nimina Chief Minister's Office cabinet room-a Council of Minister ṭhukhawm chuan grape wine siam phalna tur dan (rules) a pawm a; Mizorama Samagra Shiksha hnuaia thawkte hlawh tihpun a remti bawk.

Council of Minister chuan, Excise & Narcotics department aṭanga lut, The Mizoram Liquor (Prohibition) Draft Rules an ngaihtuah a, sawiho a nih hnuah an pawm.

MLP Rules duanah hian, Mizorama grape hmanga wine siam leh zawrh phal rawt a ni a; pawm a nih tâk avangin Champhai leh Hnahlan winery-ah dan hnuaiah grape wine siam leh zawrh theih a ni dawn ta a ni.

Finance department aṭanga lut, 'Granting of Allowances to Samagra Shiksha Employee, Re-designation of Substitute Teacher Post and Fixation of Minimum Remuneration (Inclusive of Allowances)' pawh Council of Minister chuan an pawm.

Finance department rawtna hi Mizorama Samagra Shiksha-a thawkte hlawh tihpunna, dearness allowance 15% leh medical allowance bakah, an thawh rei dan azira hamṭhatna (allowance) pekna tur a ni a; hlawh tihpunna zat tur erawh tarlan a ni lo. Samagra Shiksha hnuaiah hian thawktu mi 5,000 vel an awm a ni.

Federation of Mizoram Samagra Employee (FEMSE) chuan thuchhuah siamin, Council of Minister ṭhukhawmin Samagra Shiksha hnuaia thawkte hlawh punna tur an pawm chu lawmawm an tih thu an tarlang a; Chief Minister, School Education Minister, minister dangte leh sorkar offi cial-te chungah lawmthu an sawi a ni.

CABINET-IN AN PAWM DANGTE
1) Department hrang hranga contract employee-te hnenah 10% dearness allowance pek.
2) Infiammi, ram chhung leh ram páwn inelnaa hlawhtlingte tana Mizoram Sports Incentive Cash Award Scheme 2022 inkaihhruaina hrang hrang.
3) Ramri luhkáa immigration check post din tura hmalaknaah, Zokhawthar, Kawrpuichhuah leh Zorinpuia immigration check post-ah Mizoram police post 20 siam belh.
4) Home department hnuaia head constable (operator) post 34 chu MPRO, Mizoram Police hnuaia assistant sub-inspector (operator)-a hlàn kai.
5) Mizoram Startup Mission (Government Society) din.
6) District tina DRDA-te District Rural Development Office (DRDO)-ah leh project director (PD) 11-te MCS junior administrative grade level post-a lak luh (encadre).