AR-in kuhva ip 1,948 an man

Champhaia Assam Rifles-te chuan nimin khan Myanmar aṭanga phalna nei loa lâk luh kuhva rah ip 1,948 an man a, cheng nuai 400 chuang man a tling.

Vanglaini thu dawn danin, kuhva rah phurtute hian sorkar aṭangin mipui ni tin mamawh (essential commodity) phurh phalna an nei a ni. Kuhva rahte chu truck 25-ah phurh a ni a, Assam Rifles-te chuan an thu dawn bawhzuiin truck-te chu an endik a, truck chhunga buhfai ip hnuaia dah kuhvate chu an man ta a ni.

Covid-19 vanga inkhàr­khip a nih hnuah Assam Rifles chuan essential commodity phurh phalna neite an endik ngai tawh lo a, mahse, dan phal loh thil phur lut an awm thu an dawn avangin July 20 aṭang khan essential commodity phurh phalna nei lirtheite an endik leh ṭan.