Missionary thinlung púa thawh hi ram dinchhuahna tur a ni - Education Minister

School Education minister Lalchhandama  Ralte chuan nimin khan a bial chhunga Sawleng khua a tlawh a; vantlang inkhawmah thu sawiin, missionary thinlung pu chunga hna thawh chu Mizoram dinchhuahna tur a nih thu a sawi.

Lalchhandama Ralte chuan, zirtirtute chu tu leh fate hma lam hun siamtu an ni tih sawiin, "Zirtir hna hi missionary hna a ni a, missionary thinlung púa zirtirtu hna thawh hi kan ram dinchhuahna tur a ni," a ti a, Pathian rawngbawlnaa ngaia lungsi taka thawk tur leh, ei leh in duh zawng thlengin zirtirtu nihphung dik tak anga awm turin  zirtirtute a chah.

MNF sorkar hun rei lo tê chhungin School Education department-in hlawhtlinna ṭhahnem tak a nei tih sawiin Lalchhandama chuan, "Hmasawnna dang - kawngpui ṭha, electric power-te leh tui in tur ṭhate a pawimawh a, amaherawhchu, zirna hi mihring chherna a nih tlat avangin hmasawnna kawng hrang hrang zingah a pawimawh ber a ni," a ti a; Darlawn Higher Secondary School-ah science zirna hawn thar a nih tur thu sawiin, hmar tlangdung tan a chhenfakawm dawn tih a sawi.

School Education Minister hian January 6, Ningani zan khan Darlawn community hall-ah Darlawn leh a chhehvela sorkar hnathawk leh khaw­tlang hruaitu a kâwm bawk a; an puan­ven sawi chhíng a, mahni hna ṭheuh ṭha­hnemngai taka thawk turin a chah. Khawtlang hruaitute pawh anmahni khua ṭheuha zirna-in leh a compound-te humhalh tur leh zirna hmunte chu humhalh tlat turin a sawm bawk.