CYMA hnuaia ruihhlo do turin CADS din thar leh a ni dawn ; Ruihhlo do hi a chakawm loh - CYMA President

Central YMA chuan ruihhlo dotu tur Central Anti Drugs Squad a din leh dawn a, September 9, 2022 aṭangin hma an la ṭan tura ruahman a ni. CYMA president R Lalngheta chuan, ruihhlo do chu thil chakâwm a nih loh thu a sawi.

August 29, Thawhṭanni zana YMA Central Executive Committee (CEC) ṭhukhawm chuan, ruihhloin Mizoram a rùn mek dan thlir chungin CYMA hnuaiah ruihhlo do pawl, Central Anti Drugs Squad (CADS) din an remti a; September 9, 2022, Zirtawpniah member-te lawmna leh hlanna hun hman a ni ang.

Ruahman dan chuan, CADS-ah hian term khatah member 50 zel an awm dawn a, term khat chu thla hnih a ni ang. CADS member turin Aizawl khawpuia YMA branch 108 aṭangin mi pakhat ṭheuh ruat tum a ni.

ṬKumin September-October chhunga CADS convener atan CYMA finance secretary Roneihthanga ruat a ni a, asst. convener-ah CEC member K Darthantluanga, secretary-ah CEC member Lalsáwma Ralte leh assistant secretary atan CEC member R Lalchhandama te ruat an ni bawk.
CYMA president R Lalngheta chuan Vanglaini palai zawhna chhángin, ruihhlo do chu thil châkawm a nih loh thu a sawi a, "Ruihhlo do chuan sawisel pawh kan tâwk nasa ṭhin. Mahse, kan ramin a mamawh si avangin châk lo tak chung pawha kan tih a ngai a ni," a ti.

R Lalngheta chuan, ruihhlo a hluar êm avangin Aizawla YMA branch hrang hrang hruaitute kal khawmin CYMA hnuaia ruihhlo do páwl din ṭha an tih thu sawiin, "Veng leh khaw hrang hrang aṭang pawhin ruihhlo do leh tura ngenna kan hruaitute'n an dawng nasa hle," a ti a; ngun taka ngaihtuah a nih hnuah CYMA hnuaiah ruihhlo dotu tur din an rêl tak thu a sawi.

Fimkhur taka an kal dawn thu sawiin CYMA President chuan, "Kan duty leh chêt chhuahna apiangah mi man thei police leh excise officer-te lo teltir ve turin sorkarah ngenna kan thlen dawn a ni," a ti.

YMA hian kum 2004 aṭangin ruihhlo an do ṭan a, CYMA hnuaiah SRS dinin, SRS hmangin September 2008 thleng hmalak a ni. SRS tihtawp a nih hnuah kum 2009-2010 chhung Flying Squad dinin ruihhlo do a ni a, kum 2011 aṭanga August 2013 thleng Central Anti Drug Squad (CADS) hmangin ruihhlo do leh a ni.

April 15, 2015-ah SRS din thar a ni a, batch 10-na thleng awmin, October 15, 2019-ah tihtawp a ni a; kum 2019 October thlaa SRS tihtawp a nih aṭangin CYMA hnuaiah ruihhlo dotu páwl bik siam a ni tawh lo.

CYMA-in ruihhlo a do laiin November 1, 2011 aṭanga October 15, 2019 inkarah ruihhlo chi hrang hrang Rs 29,33,93,753 hû man a ni. Ruihhlo mante chu report-a lang chin a ni a, ruihhlo man zat tarlan si, a hlutna zat tarlan loh tam tham tak a awm.

CYMA hnuaia ruihhlo dotu pawlte'n ruihhlo an man zat hlutna tarlan chin Rs 29,33,93,753 zinga Rs 3,08,21,968 chu CADS man a ni a, SRS man hlut zawng chu Rs 26,06,26,635 a ni. YMA CEC leh CYMA hnuaia Kumpuan Committee-te'n an man Rs 19,45,150 hû a awm bawk.