Damlo bill pek hun tur MSHCS-in an hre lo

Mizoram State Health Care Society (MSHCS) hotute chuan Health Care Scheme (HCS) hnuaia damlote bill bá an pek theih hun tur an la hre thei lo.

Vanglaini palai zawhna chhangin MSHCS hotute chuan, damlote bill pek chhuah tur an neih rih loh thu an sawi a, "Sorkar kan ngaichâng tawp a, pawisa min pek hun hunah damlote bill kan pe chhuak ve nghal ang," an ti a; damlote bill chu a luh hmasak dan indawtin an pek ṭhin thu
an sawi.

MSHCS hotute sawi danin, HCS bill chu hun eng emaw chen pek chhuah theih ni tawh lo mah se, bill lut a awm reng a; bill lutte chu endikin, a
dik thlapa thehluhte chu pawisa awm huna sum pek theih turin an dah zel a ni.

Vanglaini-in RTI Act hmanga a zawhna Directorate of Health Services SPIO-in July 20, 2022-a a chhàn danin, MSHCS hnuaiah damlo inenkawlna senso la pek loh cheng vbc. 72.15 a awm mek a, chu'ngte chu mi 26,673-te bill a ni. Chumi hnuah damlo bill eng emaw zat a luh belh tawh a, pek chhuah a awm lo thung.

SPIO chhan danin, damlo bill batsak chu mi 26,763 an ni a, chu'ng zinga mi 2,812 chu Covid-19 vanga damlo niin, mi dang 23,861 chu natna dang vanga damlo an ni. Covid-19 vanga damlo mi 2,948-te'n bill an thehlut tawh a, chung zinga mi 136 chu pawisa pek an ni tawh.

Mizoram State Health Care Society-in bill a dawn tawh, pawisa a la pek loh zawng zawng chu Rs 72,15,47,595 a ni a; chu'ng zinga Rs 4,14,65,662 chu Covid-19 vanga damlote inenkawlna bill niin, Rs 68,00,81,933 chu natna dang vanga damlo inenkawlte bill a ni.