KHAWTHLIR
MZI-in thisen pe
Mizo Zaimi Inzawmkhawm chuan nimin khan MZI din champha vawi 42-na lawm nan Aizawl leh Serchhipah thisen pek an huaihawt. Aizawlah Civil Hospital tan mipa 14 leh hmeichhia pakhatin thisen unit 15 an pe a; Serchhipah District Hospital blood bank-ah mipa pasarih leh hmeichhia pakhatin thisen unit riat an pe bawk.
NCC training camp
20 Mizoram battalion NCC, Aizawl chuan August 23 aṭanga nimin thleng khan State Training Centre, Tanhrilah Training Camp an buatsaih. Camp-ah hian Mizoram hmun hrang hrang aṭangin high school leh college-a cadet-te an tel a, camp commandant Col. Saurabh Sareen hoin Indian Army aṭanga instructor-te'n thil pawimawhte an zirtir a ni. Mizoram páwn aṭangin Republic Day Parade, Delhi-a tel tur Inter Group Drill Team an tel bawk.
Mizorama dan loa sumdawng dap rêl
Central YMA hruaitute August 29, Thawhṭanni zana CYMA Committee Room-a ṭhukhawm chuan, hnam dang dan loa Mizorama sumdawngte dap chhuah kawngah chak zawka hmalak an rél. Hmalak zel dan tur an duan rualin, sorkar hmalakna ngaihchàn an rél a ni.
Pipe band din rêl
Champhai District Education Committee (DEC) chu an chairman James Lalrinchhana, bawrhsap hoin August 29, Thawhṭanni khan an ṭhukhawm. Kumin September thla chhungin RBSK hnuaia School Health Programme kaltlangin primary school 24-ah hriselna dinhmun endikna buatsaih leh School Education department hnuaiah pipe band din thar leh an rél.
WDC-PMKSY zirho
State Institute of Rural Development & Panchayati Raj (SIRDPR), Mizoram leh Mizoram Watershed Development Agency-te chuan nimin khan SIRDPR hmunah WDC-PMKSY 2.0 chungchang zirhona an buatsaih a, district hrang hranga watershed development team member 33 an tel. Training hi Sept. 2, 2022 thleng neih a ni ang.