Aizawl leh Lawngtlaiah SEDP hawn a ni

Nimin khan Aizawl leh Lawngtlaiah sorkar flagship programme, Socio Economic Development Programme (SEDP) sum chhungkuaa pek tur hawn a ni a, ṭanpuina sum dawng tur mi ṭhenkhat hnenah pawisa pek nghal a ni.

Aizawlah chuan family oriented SEDP hi minister of state Lalruatkima'n Assembly Conference Hall-ah a hawng a; SEDP hlawhtlinna chu ṭanpuina dawngtute tumruhna leh hmathlir an neih danah a innghah thu a sawi.

Hawnna inkhawm hi Aizawl District Committee on SEDP chairman Dr Lalhriatzuali Ralte, bawrhsapin a kaihruai a; Mizoram Rural Bank kaltlangin SEDP first instalment dawng tur mi 33-te bank account-ah pawisa thun nghal a ni. Sorkar ruahman dan chuan, kumin November thlaah second instalment peih hman tum a nih thu tarlan a ni bawk.

Aziawl district-ah hian SEDP hnuaiah AMC Area Local Level Committee 83 leh VC Level Committee 65 a awm a, Aizawl district-a MLA bial 12-a SEDP first instalment dawng tur chhungkua 1,500-te chu an vaiin chhungkaw 18,000 an ni.

Lalruatkima chuan, SEDP a hlawhtlin theihna tura hma latu leh ngaihtuahna sêngte chungah lawmthu a sawi a, "Beneficiary-te hlawhtlinna chu an tumruhna leh hmathlir an neihnaah a innghat a, kan chhungkua tan leirem kan rahna turin eng nge kan tih ang tih ngaihtuah rânin, sorkarin a thlâwnin min pe lo a, kan chhungkuain leirem kan rah theihnan kawng min hawnsak tih hi hre reng ang u," a ti.

Inkhawmah hian MLA pathum - C Lalmuanpuia, Prof. F Lalnunmawia leh Zothantluanga te, Aizawl mayor Lalrinenga Sailo, deputy mayor R Thanglura, councillor pahnih B Lalawmpuii leh Lalfakzuala Chenkual te, kut hnathawktute an tel a ni.

Lawngtlaiah chuan CYLA Hall-ah SEDP hawnna inkhawm buatsaih niin, Lawngtlai East bialtu MLA H Biakzaua'n a hawng a, MLA bial pathuma Village Level SEDP Committee thlan pathum ṭheuh hnenah an inrêlbawlna (administration cost) tur pawisa cheque a hlân.

Lawngtlai District SEDP Committee secretary Marilyn Rualzakhumthangi tarlan danin, Lawngtlai district-a MLA bial pathum - Tuichawng, Lawngtlai West leh Lawngtlai East-a khaw 187-ah SEDP dawng tur chhungkaw 4,500 thlan an ni.