Mizoram sorkar SEDP-ah a hlawhchham - Congress ṭhalai

Congress ṭhalaite chuan, August 29, 2022-a Mizo Hnam Rûna MNF adviser Robert Romawia Royte, minister of state thusawi aṭangin SEDP hnuaiah Rs 3,00,000 sem a nih loh tur thu a chian thu an tarlang a, MNF hruai Mizoram sorkar chu SEDP-a hlawhchhamah an puh.

Mizoram Pradesh Youth Congress Committee (MPYCC) chuan thuchhuah siamin, Robert Romawia'n, 'MNF party chuan direct-in SEDP kan sem mek a, vawiina Rs 25,000 dawng turte hian MNF-a sorkar zel chuan nuai thum aia tlem lo an dawng dawn...' tia a sawi chu MNF sorkar chhung ngeia SEDP hnuaia Rs 3,00,000 chhung tin hnenah an sem loh turzia tichiangtu a nih thu an tarlang.

MPYCC chuan, Robert Romawia thusawi chu mipui bumna a nih bakah, mipui hmaa dâwt lian tak sawina a nih thu tarlangin, "Ngaihdam dil rawh se. MNF hi an sorkar zel dawn tih khawiah mah a awm lo. Tun dinhmun enin mipuiin rinna an nghat zo tawh lo. SEDP hi a hlawhchham tih chiang takin a lang ta a ni," an ti.

Robert Romawia'n, budget tharah Taxation Minister leh Revenue Minister te zara Mizoram budget a pun a rinawm thu a sawi a, 'SEDP-a kumina kan cover loh hi nakkumah kan cover vek theih a rinawm,' tia a sawi chu mipui nasa zawka sàwr fê tumna, chhiah nasa zawka khawna SEDP sem tumna a nih thu MPYCC chuan an tarlang.

Congress ṭhalaite chuan, an party chu tih tura an intiamah an ding nghet ṭhin nia sawiin, "Pu Lalsawta hoa Mizoram mipui tan sorkar ṭha siam tumin kan inpuahchah mek a, kan intiamnaah kan ding nghet tawh ṭhin angin kan ding nghet dawn a ni," an ti a; an party ṭawiawm turin Mizoram mipui an sáwm a ni.