August-ah hripui vei mi 4,167 hmu tawh

August 29, Thawhṭanni khan Mizoramah Covid-19 vei mi 103 hmuh chhuah a ni a, August thla chhungin mi 4,167 hmuh chhuah a ni tawh. Nimin khan hripui vei dam tawh mi 86 chhuahtir an ni a, Covid-19 vanga thi an awm lo.

Thawhṭannia Covid-19 positive hmuh thar mi 103-te chu mipa 51 leh hmeichhia 52 an ni a, rapid antigen test hmanga hmuh chhuah vek an ni. Swab sample endik zat 534 aṭanga positivity rate chu 19.29% a ni.

Covid-19 vei zinga dam tawh mi 86 chu nimin khan chhuahtir an ni a; district tina chhuak zat chu - Lungleiah mi 23, Aizawlah 20, Mamitah 15, Saitualah pariat, Champhaiah paruk, Serchhipah pali, Siaha, Khawzawl leh Hnahthialah pathum ṭheuh leh Lawngtlaiah pakhat a ni.

IDSP record angin, Mizoramah Covid-19 vei 2,36,967 hmuh chhuah a ni tawh a, mipa 1,10,355 leh hmeichhia 1,26,612 an ni a, mipa aiin hmeichhia 16,257-in an tam zawk. Nimin tlai dar 5 thleng khan mi 2,35,797 (99.51%) chhuahtir an ni tawh a, mi 720 (0.30%) thi tawhin, enkawl mek mi 450 (0.19%) an awm.

Kum 2011 chhiarpui angin, Covid-19 vei hmuh tawh 2,36,967 chu state mipui zat aṭangin 21.60% a tling a, India rama state zingah a sang ber. Mi 1,000 zelah positive 216 an awm tawh ang a ni a, hripui vangin mi 1,00,000 zelah mi 65 an thi tawh ang a ni bawk.