Lianchhiari Lunglèn Tlánga Lung tohlâwt a khîk belh lo - INTACH

Lianchhiari Lunglèn Tlanga lung tohlâwt chu tun hnaia lìrnghîng vangin a khîk belh nia sawi a ni a; INTACH, Mizoram Chapter erawh chuan, a khi sa niin an tarlang thung.

INTACH Mizoram Chapter chuan, Lianchhiari Lunglèn Tlang chu July 20, Thawhṭanni khan geologist Dr Laldinpuia leh a hote leh INTACH aiawhte'n an enfiah tih sawiin, "Lung tohlâwt chu inthuahthîp tuizai awm saah sik leh sâ avangin hun rei deuh tawh aṭang khan a khi a, February thlaa thlalak leh tuna an tlawh ṭuma thlalak khaikhinin, a khì hi a zauh belh lo niin a lang," an ti.

INTACH tarlan danin, Lianchhiari Lunglen Tlanga lung tohlâwt hi Mizoram University-a geologist-te'n uluk takin an enfiah a; lung inphah dan, a sakhat dan leh a chak záwng, a tuizai (joints) awm dante chîk taka zirin an chhinchhiah a ni. Dr Laldinpuia chuan, lung tohlâwt hmáwr lama ṭhut leh uai te, ṭum khatah mi tam tam ṭhutte a him lo tih a sawi a, "A khi lai hi cement hmangin tui lût thei loa zût phui phawt ni se," a ti. INTACH chuan, lung tohlâwt chungah kal theih/phal loh chin neih a hun tawh em, tih ngaihtuah a ṭul thu an tarlang.

INTACH Mizoram convener P Rohmingthanga chuan, Ṭhasiama Se No Neihna tlangdunga leilung khi chat chu tui lût lo tura silpauline hmanga khuh turin Khawbunga INTACH member H Lalnunmawia an chah tih sawiin, an ngen angin July 18, 2020 khan INTACH leh Tuipuiral Group YMA bultumin Chawngtui Branch YMA-te'n an khuh tih a sawi.

P Rohmingthanga tarlan danin, Ṭhasiama Se No Neihna tláng báwk thlen hmaa Chawngtui VC leh YMA-te'n silpauline-a an khuh bâk ft. 10 vela thui leh Chawngtui khaw lama tlangdung inkhawh thla ft. 195-a thui khuh belh a ni. Ṭhasiama Se No Neihna Tláng takah erawh chuan leilung khi chat emaw, a dinhmun tiderthâwng thei hnûhmá a awm lo.