Serchhip damdawi-in sawn a nih theih nana hma la lo turin Tuikum MLA chah

Joint Action Committee on Serchhip District Hospital Site (JACoSDHS) hruaitute chuan, Serchhip bial aṭanga Serchhip District Hospital sawn chhuak a, Tuikum biala dah a nih theih nana hma la tawh lo turin Tuikum bialtu MLA Lalrinawma an duh thu an puang.

JACoSDHS hian nimin khan Serchhip Press Club-ah thuthar thehdarhtute an kawm a; an chairman Kapliana Pachuau chuan, Power Grid Corporation of India sum vbc. 21 hmanga Serchhip District Hospital sak tur chu sak thuai an phût thu sawiin, damdawi-in chu Serchhip constituency aṭanga sawn chhuah tuma Tuikum bialtu MLA a lo phe ve sek chu an ngaimawh hle thu a sawi.

Kapliana Pachuau chuan, "Bûkpui dáia District Hospital sawn chhuah a nih theih nan Tuikum bialtu MLA Pu Lalrinawma’n nasa taka hma lain, Chief Minister leh Health Minister te, Health department official-te thlengin na takin a kar niin kan hria a, a pawi kan ti hle. District Hospital hi Serchhip bial aṭangin engti kawng zawng mahin Tuikum Constituency biala sawn kan phal ngai dawn lo a, kan damdawi-in min sawn chhuahsak tuma a hmalakna hi chawlhsan tawh se kan duh hle a ni,” a ti.

District Hospital thar PGCI CSR sum vbc. 21 hmanga sak a ni tur chu an lawm hle thu sawiin Kapliana chuan, cheng vbc. 21 chu a hmun ngaia damdawi-in thar sakna tura detailed project report (DPR) siam, dil chhuah leh pek a nih ang ngeia sak thuai an phût tih a sawi.

JACoSDHS Chairman sawi danin, District Hospital sakna atan NGO Coordination Committee-in Bûkpui ram an rawt a; Bûkpui ramah sak a nih tur thu chief minister Zoramthanga'n July 25, 2022 khan Serchhip Auditorium-ah a puang a ni.

Chumi hnuah JACoSDHS chuan Serchhipa VC, YMA, MHIP leh MUP branch hrang hrangah ngaihdan an la a, pawl hrang hrangin a hmun ngaiah sak an duh. Ni khat chhunga Serchhipa VC leh pawl hrang hrangte'n a hmun ngaia damdawi-in sak an duh thu seal leh signature hmanga an nemnghehna August 16 khan Chief Minister hnenah an pe a ni.

Chief Minister chuan thil awm dan Health minister Dr R Lalthangliana a hrilh tih sawiin Kapliana chuan, Health Minister chuan department thuneitute Serchhipah a tír a, damdawi-in ṭhiah chhunga lo luah lailâwk tur enpui turin JACoSDHS hruaitute a ngen bawk a, a chungah an lawm thu a sawi.

Kapliana Pachuau chuan, Chief Minister leh Health Minister te chu hma la thuai turin an ngen tih sawiin, "CM duh dan anga Health department thuneitute Serchhipah rawn tír a, damdawi-in ṭhiah chhunga luah lailâwk tur in enfel thuai kan phût a ni," a ti.