Aizawlah college zirlaite an pungkhawm ; Zirlai hruaitute thubuai Court-in a titawp

Mizo Students Union (MSU) leh Aizawl City College Joint Students' Union (ACCJSU) hruaitu hlui leh ni lai 12-te thubuai siamsak tihtawp phûtin nimin khan Vanapa Hall kawtah college zirlaite an pungkhawm. Mizoram sorkar ngenna anga Court-in zirlai pawl hruaitute thubuai a titawp a, chumi hnuah zirlai pungkhawmte pawh an ṭin darh.

MSU leh ACCJSU bul tuma PwD commi­ssioner atana B Sairengpuii ruat a nih duh loh lantirna atana PwD Commi­ssioner office, Chaltlanga zirlaite an punkhawm ṭuma buaina chhuak avangin, police-te chuan suo moto hmanga FIR an thehlut a, MSU hruaitu paruk leh ACCJSU hruaitu paruk thubuai an siamsak a ni. Zirlai hruaitute chuan Court-a inlan tura kohna June 19, 2017-ah an dawng a, an inlan ni tura ruat chu nimin, August 2 kha a ni.

Zirlai hruaitute thubuai siam­sakna dante chu - IPC Section 143 (unlawful assembly), IPC Section 145 (joining unlawfull assembly armed with deadly weapon), IPC Section 147 (rioting), IPC 152 (assaulting or obstructing public ser­vant when suppressing riot), IPC Section 353 (assault or criminal force to deter public servant from discharge of his duty) leh, IPC Section 427 (mischief causing damage to the amount of fifty rupees)-te a ni.

Zirlai pawl hruaitute thubuai siamsak an nih duih loh lantir nan leh thubuai tihtawp phût nan zirlaite chu nimin chawhma dar 10 velah Vanapa Hall kawtah an pungkhawm a; Aizawla college hrang hranga zirlaite an tel. Court-in inlan tura a koh zirlai hruaitu 12-te chu kal an phal lo a, sorkar nena an inrem vek tawh emaw an tih laia a rûka thubuai siamsakah sorkar an puh.

MSU president RB Lalmal­sawma chuan, zirlai hruaitute chu Court-ah inlan an phal ngai dawn lo tih sawiin, "Court-a an inlan dawn chuan kan vaia kan inlan a ngai a, jail-ah an táng dawn a nih pawhin kan vaiin kan táng ang. Hetianga zirlai hruai­tute a rûk a rála thubuai siamsak hi tun hnuah thleng nawn tawh ngai lo se kan duh," an ti.

PwD Commissioner pisa bula punkhawm laia MSU president PC Lalrinhlua chuan, a ruka thubuai siamsak an nih thu sawiin, "Kan statement pawh police-te hian la loin, Court-in min rawn ko tawp mai a ni," a ti a; tih dik loh an neih loh vanga hlauh an neih loh thu a sawi.

PC Lalrinhlua chuan, dan a zahawm avangin dan hmaa a dikna sawi tura Court-a inlan phal turin zirlai pungkhawmte a ngen a; mahse, zirlaite chuan an remti lo.

Chawhma dar 11:15 velah public prosecutor RC Thanga'n civil judge H Lalduhsanga hnenah zirlai 12-te thubuai chu titawp turin a ngen a; a ngennaah chuan, "He thubuai kalpui zel hi sorkarin ṭul tihna a nei tawh lo,' tih a ni. Court chuan chawhnu dar 1:30 velah order tichhuakin, zirlai hruaitu 12-te thubuai chu sorkar ngenna angin a titawp.

Zirlai hruaitute thubuai tih­tawpna order tihchhuah a nih thu hi chawhnu dar 1:45 velah puan a ni a; chumi hnuah zirlaite chuan resolution an pass a, harsatna dang awm loin an ṭîn darh zui a ni.

Zirlaite resolution pass chu, 'Tun hnuah zirlai hruaitute’n ram leh hnam tana hna an thawhnaah Court case an nei tawh tur a ni lo tih leh zirlaite’n ram leh hnam tana hma an laknaah police-te kutthlak leh vuak an tuar tawh tur a ni lo,' tih a ni.

Aizawl district magistrate first class H Lalduhsanga order chhuahin a tarlan danin, PwD Commissioner atana B Sai­rengpuii ruat nawn an duh loh avangin ACCJSU thlawp MSU-te'n April 21, 2016-ah lungawi lohna an lantir a, Aizawla zirna-in hrang hrang aṭangin zirlai 2,000 vel an tel. Magistrate-in ṭîn darh tura a tih chu zâwm loin, PwD Commissioner pisa luhchilh an tum a, police-te nen an nawr a, police eng emaw zat an hliam a, mimal car pakhat tihchhiat a ni bawk.

Hetih lai hian, MSU leh an thawhpui pawlte'n lungawi lohna an lantir níte chu - January 18, January 21 leh January 22-te a ni.