Kawng chhiat chhan hi enkawl ṭhat loh vang - ZEM

Zoram Exodus Move­ment (ZEM) chuan thu­chhuah siamin, Mizorama kawng a chhiat chhan chu enkawl ṭhat loh vang liau liau a nih thu an tarlang a, "Kawng chhia hi Mizo mi­puite mualphona a tling hialah kan ngai," an ti.

ZEM chuan, tunlai hian Aizawl-Champhai inkar kawngpui (km. 190) chu lirthei áwm khauh bik tan lo chuan zawh ngaihna a awm loh khawpa a chhiat thu sawiin, "Lo theih loha zin tur tan pawh Khawzawl-Biate-Serchhip lama kal kual a ngai. Kawngpui ṭhat pangngai laia darkar 6 chhunga thlen theih kha darkar 12 lai hun hman a ngai. Damdawi-in lian zawk pan ngai khawpa damlote tan a manganthlak lehzual hle a ni," an ti a; kawng chhiat vangin zin veivâkte'n sum leh hun a lêta tam an sên phah thu an tarlang.

Kawng chhiat chhan chu leimin vang ni loin, enkawl ṭhat loh vang liau liau a ni tih tarlangin ZEM chuan, "Mizoram state kan nih hnu kum 30 chhungin kumin ang tluka kawngpui chhiat nasat leh chhiat rei hi a la awm lo hial àwm e. State highway ve meuh, district headquarters panna kawng, khaw pawimawh tak tak kalpawhna kawng, motor tênau kal theih loh khawpa hei chen a chhia hi kan hrethiam lo. Mizoram sorkar mualphona chauh ni loin, Mizoram mipuite mualphona a tling hialah kan ngai," an ti.

ZEM chuan, khuarel vanduaina, leimin leh lei tawlh vangin Mizoram chhunga inkalpawhna kawng hmun tam takah a chhe mawlh mawlh tih sawiin, "Kawng en­kawltu PWD senior officer-te'n chhun zan zawmin an thawk a, hmun tam takah inzár pharhin, mipui harsatna sutkian nghal tumin an inring ṭhap reng hi chhuanawm kan ti hle. Hetih lai hian, PWD changtu minister-te hian officer-te leh an naute thawhrim dan hi vei ve deuh se, a hmunah tlawhin hmuhpui peih se, chhun zan zawma thawktute tan pawh a phûrawm ngei ang," an ti. PWD Minister chu kawng chhiate thlawhnaa thlawh khûm mai lo a, a hmuna hmu ve ngei turin an ngen.

Ram hruaitute'n, 'India ram state zinga inkal­pawhna kawng nei ṭha ber chu Mizoram kan ni,' tih an sawi ṭhin chu chhangin ZEM chuan, "Kawng chhia vanga heti taka an mipuite kan buai lai chauh tal hi chuan, lo insûm rih deuh turin kan ram hruaitute hi kan ngen a ni," an ti.