CAG report chhui tur din kan phal lo - Dy. Speaker

Assembly deputy speaker R Lalrinawma chuan, Mizoram sorkarin Comptroller and Auditor General (CAG) of India report-ah dik lo awma a hriat avangin a chhui chiang tur Enquiry Co­mmi­ttee din a tum a, mah se, an phal lo niin a sawi.

R Lalrinawma hian nimin khan a pisaah thu­thar thehdarhtute a kâwm a; tun hnaiah CAG report-ah sorkar sum hman dik loh a lâr hle tih sawiin, "Sorkar chuan ‘CAG report hi a dik vek lo a ni’ tiin a chhui chiang tur enquiry committee chu High Court Judge (rtd) kaihhruaia din a tum hial a. Mahse, report hi Assembly lamin legislature domain, kan huang chhunga awm tawh a nih avangin kan remti lo a ni,” a ti.

Deputy Speaker sawi danin, sorkar sum hmuhna leh hman ral chungchang chu kum tinin CAG-in a endikin report a siam ṭhin a; CAG Report chu Legislative Assembly-ah Finance Minister-in thehlutin, member tinte a copy pek an ni ṭhin.

Legislative Assembly-in sorkar sum hman tur budget a pawm anga sum hman a nih leh nih loh report, CAG thehluh chu Assembly Public Account Committee-inn an en zui a, CAG report-in thil dik lo leh fel tâwk lo a report-te chu chhui zuiin, action lak dan tura rawtnate Assembly House-ah a thehlut leh ṭhin a ni.

CAG report chu final a ni lo tih sawiin R Lalrinawma chuan, "An hmuh dan leh hriat dan report a ni. Assembly Public Accounts Committee-te'n opposition party member chairman-na hnuaiah chhui zuiin, a ṭul anga hmalak emaw, action lak emaw turin Assembly House-ah recomendation a thehlut ṭhin," a ti.

Deputy Speaker chuan, CAG report avangin sorkar hnathawk lai leh pension tawhte pawh hrem an lo ni tawh ṭhin tih sawiin, "A ṭhen chu an lo thi hman a, thi tawhte hi chu ngaihdam an ni tlangpui," a ti a; pension tawh leh thawk laite chu sorkar aṭanga an sum hmuhte hrênsak emaw an nih ṭhin thu a sawi.

Zawhna chhangin R Lalrinawma chuan a mimal ngaih dan chuan CAG report chu a buaipuitute mihring ve tho an nih avangin dik lo thei nia a ngaih thu a sawi a, "Tun hma lamah pawh CAG report chu a dik hlel tih hmuhchhuah a lo awm nual tawh a ni. Hetih rual hian CAG report chu a dik lo hulhual tih tur a ni lo," a ti.