Khuarel chhiat tâwkte ṭanpuina tur CYMA-ah Rs. 1,02,84,682 a lut tawh

Kumin June thla tìr lama Mizorama tuilian leh leimin nasa tak vanga chhiat tawkte ṭanpuina turin Central YMA chuan nimin khan pawl hrang hrang aṭangin ṭan­puina tur sum ṭhahnem tak an dawng. CYMA-a ṭan­puina sum lut tawh zat chu Rs. 1,02,84,682 a tling tawh.

CYMA thuchhuah tarlan danin, ṭanpuina petute chu, Mizo Society of Malaysia-in Rs. 50,000, Mizo Society of America-in Rs. 5,65,050, Mizo Presbyterian Church of USA Kohhran Hmei­chhia-in Rs. 20,041, Kabaw Central Mizo Ṭhalai Pawl, Tamu district, Myanmar-in Rs. 1,70,000 te a ni a; a vaiin Rs. 7,05,091 a ni.

Kabaw Central MṬP, Tamu district aṭang hian CYMA-a ṭanpuina pawisa hlan turin an president PC Lalthankima (Zohmun), vice president D Lalhmingliana (Kanan), assistant secretary Kawlhmingliana Hnamte (Tamu), auditor J Khawl­hmingthanga (Tamu) leh auditor Sairothanga Tuallawt (Khampat)-te Mizoramah an rawn zin a; nimin khan CYMA pisaah an hlan. Ṭanpuina pawisa an pek hi Myanmar Kyat 40,44,000 a ni a, India pawisain Rs. 1,70,000 a ni.

Central YMA chuan, Mizo­rama khuarel chhiat tâwkte chhawmdawlna atana ram danga awm Mizote'n ṭanpuina an pe ṭhin chu lawmawm an tih tak zet thu an tarlang a; ṭanpuina sum CYMA lut tawh zat chu Rs. 1,02,84,682 a tling tawh tih an tarlang bawk.