Kût pahnih chiah hman rawt dawn

Mizoram sorkarin kût hman ṭhinte zir chiang tura a din Study Group chuan sorkar bultuma kum khata kût pahnih chiah hmang tawh turin rawtna an siam a, chu chu Chapchar Kut Organising Committee-ah an thlen dawn.

April 28, 2017-a Chapchar Kut Organising Committee ṭhukhawm chuan, Mizorama kût hman ṭhin pathum - Chapchar Kut, Anthurium Festival leh Ṭhalfavang Kût te chu a hrang hranga hmang tawh loin, hmun khatah khaikhawm a, pui tham zawka Chapchar Kût lawmna kalpui ni se tih rawtna angin, a zir chiang tur Study Group a din a ni. Study Group chu nimin khan convener Hmingthanzuala, Art & Culture director hoin an ṭhukhawm.

Study Group chuan, kum khatah kût pahnih lawmna buatsaih ni tawh se an ti a; Chapchar Kût chu Mizo hnam ziaráng vawnhim leh chawisanna lam hawiin, a lawmna pawh lian tham leh huap zau zawka buatsaih an rawt a, November thla­ah ṭhalaite tana intih­hlimna lam hawi kût dang buatsaih turin Chapchar Kut Organising Committee-ah rawtna thlen an rél a ni.