Civic Action Programme hman dan tur sawiho

Border Security Force (BSF) 159 battalion comman­dant LS Dahiya leh Tlabung khawtlang hruaitute chuan, nimin khan Tlabungah ramria chêngte tihhmasawnna tura Civic Action Programme hman dan tur an sawiho.

Tlabunga V/C leh tlawmngai pawl hrang hrangte chuan, BSF Civic Action Programme chu Tlabung khaw chhung bik hmasawnna turin hman ṭangkai a ni ngai mang lo tih sawiin, tuna 159 BSF commandant ṭha­hnemngaihnaa Tla­bung khaw chhung tihhma­sawnna atana hman a ni tur chu lawmawm an tih thu an sawi a, "Khawtlangin ṭangkai taka kan chawr theihna tura hma latu Commandant kan nei hi kan lâwm hle a ni," an ti.

159 BSF commandant LS Dahiya chuan, ramri bula chêngte dinhmun kawng hrang hranga chàwikàn chu sorkar laipuiin a ngai pawimawh tih sawiin, Civic Action Programme tihhlawhtlinna tur sum chu Ministry of Home Affairs tum a nih thu leh, sum chu August thla chhung ngeia pek chhuah hman beisei a nih thu a sawi.

LS Dahiya chuan, Tla­bung leh mipuite dinhmun chàwikàn a nih theih nan theihtawp chhuah zel a tum thu a sawi a, "Tih theih kan nei tam lo a ni mai thei. Mahse, kan theihna zàwnah theihtawp kan chhuah zel dawn a ni," a ti.