MPC leh MNYF-in sorkar an dem

MPC party leh MNF ṭha­laite chuan thuchhuah siamin, Persons with Disabilities (PwD) commissioner atana B Saireng­puii ruat nawn duh loh lantirtu zirlai pawl hruaitute Mizoram sorkarin thubuai a siamsak chu an dem thu an tarlang.

MPC chuan, B Sairengpuii, PWD commissioner atana ruat nawn duh loa zirlai pawlte an pên chhuak chu ram leh hnam tan a nih avangin lawmawm an tih thu an tarlang a, "Mipui leh zirlaite lawm tak leh thlamuang taka an awm tawh hnuah zirlai hruaitu eng emaw zat phuahchawp taka sorkarin criminal case a siamsak kha âwm lo kan ti a, Congress sorkarin ram leh mipui leh zirlaite aia mimal thil ti theite thlavang hauhna a nei lian ṭhin hi kan dem tak zet a ni," an ti.

Mizoram sorkar chu zir­laite dikna leh chanvo rahbeh­sak ṭhinah puhin MPC chuan, "An zirlai buaipui hleithei lo khawpa harsatna leh buaina an tâwk fo hi kan lainat a, an chunga hleihlentu Mizoram sorkar kan dem tak zet," an ti a; zirlai hruaitute thubuai chu tihtawpsak ngei turin sorkar an phût a ni.

MNYF pawhin, kum 2016 tìr lama rualbanlote thlavâng hauhnaa a sûlsutu zirlai hruaitute kum khat a liam hnua sorkarin thubuai a siamsak leh, zirlaite pun khawm buai kher nghaka thubuai a hnûk kîr duh lawk lo chu an dem thu an tarlang a, "Mahni nupui nau thlavang hauh vanga zirlai pun khawm hi awm tawh suh se,” an ti.

MNYF chuan, Congress kaihhruai sorkar kal dik loh vanga zirlaite thisen a chhuak fo nia sawiin, "Tuna zirlai hruaitute thubuai rip tak tak awrhtir an ni leh hi sorkarin Mizo zirlaite an hmuhsitzia leh engahmah an ngaih lohzia a tilang," an ti a, zirlaite'n vuak tuara thisen chhuaka ram leh hnam thatna tura hna an thawh tawhte ngaihtuahin, sorkar thil tih dan chu van­duaithlak an tih thu leh demo­cracy palzûtna dik taka an ngaih thu an sawi bawk.