KHAWTHLIR

Doctor sîksawi
Health department chuan August 1, 2017 khan notification tichhuakin, doctor pathumte awmna a sîksawi. Aizawl Civil Hospital-a awm lai Dr Lalhmachhuana Hmar chu Lunglei Civil Hospital-ah, Lunglei Civil Hospital-a awm lai Dr Lalhmunmawii chu Tlabung Sub-Division Hospital-ah leh Lunglei Civil Hospital-a awm lai Dr Lalramengi chu Champhai Civil Hospital-ah sawn an ni.

KVS tlawh
Parliamentary secretary (School Education) Joseph Lalhimpuia chuan nimin khan cheng vbc. 23.85 sênga sak, Lunglei Ramthar Venga Kendriya Vidyalaya School (KVS) hmun a tlawh. Joseph Lalhimpuia ­chuan, India ram pum huap pawha zirna in ṭha berte zinga mi KVS, Lunglei khawpuia a ding ta chu hmasawnna rahbi lian a nih thu a sawi.

V/C training
SIRDPR chuan Thawhlehni khan Durtlang Leitana an hmunah ni thum awh tur, ‘Training on Sustainable Development Goals (SDG) for Elected Village Council Members’ an buatsaih a; Darlawn RD block chhunga V/C member 37 an tel.

EDS sawifiah
NEDP hnuaia enterprenuership summit neih tur leh business plan contest chungchang inzirtirna nimin khan Champhai College-ah buatsaih a ni. EDS master trainer-in Enterprenuership Development Scheme (EDS) a sawifiah a, "Kum 2017-18 atan EDS-ah hian cheng nuai 500 dah a ni a, sum hmang hian enterprenuership tihhmasawnna leh inzirtirna Mizoram hmun hrang hrangah neih a ni," a ti.

Ruang zawng
August 1, Thawhlehni chawhnu dar 1 vel khan Esther Lalawmpuii (9) d/o Zonuntluangi, Khamráng chu Tlawng lui, Ṭiauzauah chesualin a tla a; he thu buatsaih lai thleng hian hmuh a la ni lo. Thu dawn danin, Esther-i hi a pute nen Tlawng kama an nûl siamah an kal a, a u nena Tlawng lui kama an awm lai chu chesualin tuiah a tla a ni.